ხორვატიის ეროვნული გუნდის მთავარმა მწვრთნელმა ზლატკო დალიჩმა ფეხბურთის ფედერაციის პრეზიდენტს აცნობა, რომ 2026 წლის მსოფლიო ჩემპიონატის შემდეგ ნაკრების სათავეში მისი მოღვაწეობა დასრულდა.
დალიჩმა ხორვატიის ნაკრების ისტორიაში ყველაზე წარმატებული და ყველაზე ხანგრძლივი პერიოდის მქონე მთავარი მწვრთნელის რანგში დაასრულა საქმიანობა.
მისი ხელმძღვანელობით ხორვატიამ 2018 წლის მსოფლიო ჩემპიონატზე ვერცხლის, ხოლო 2022 წლის მუნდიალზე ბრინჯაოს მედალი მოიპოვა.
გარდა ამისა, გუნდმა 2023 წლის უეფას ერთა ლიგაზე ვერცხლის მედალი მოიგო, დალიჩმა კი ნაკრები, 2026 წლის მსოფლიო ჩემპიონატის გარდა, EURO 2020-სა და EURO 2024-ზეც გაიყვანა.
„ნაკრების მთავარი მწვრთნელის თანამდებობა ბევრი რთული გადაწყვეტილების მიღებას მოითხოვს, თუმცა ეს ჩემთვის უდავოდ ყველაზე რთული გადაწყვეტილება იყო.
ყოველთვის ვამბობდი, რომ საკუთარი ქვეყნის ეროვნული ნაკრების გაძღოლაზე დიდი პატივი არ არსებობს და ჩემთვის ამაზე მნიშვნელოვანი, საპასუხისმგებლო და შესანიშნავი სამსახური ვერ იქნებოდა.
როდესაც ნაკრები ჩავიბარე, ფეხბურთელების შესაძლებლობებისა და საკუთარი თავის მჯეროდა, თუმცა ვერც კი გავბედავდი მეფიქრა, რომ თითქმის 9 წლის განმავლობაში ყველაფერს მივაღწევდით, რასაც მივაღწიეთ.
ვერ აღვწერ, რამდენად ვამაყობ თითოეული გამარჯვებით, დიდ ტურნირებზე მოპოვებული წარმატებებით, 3 მედლითა და ხორვატული ფეხბურთის დიდებული საღამოებით, მაგალითად, მსოფლიო ჩემპიონატებზე ინგლისისა და ბრაზილიის დამარცხებით.
თუმცა ყველაზე მეტად ვამაყობ იმ ერთიანობით, რომელიც გუნდსა და ხორვატ ხალხს შორის შევქმენით და რომელიც განსაკუთრებით კარგად გამოჩნდა მსოფლიო ჩემპიონატებზე მედლების მოპოვების შემდეგ გამართულ დაუვიწყარ ზეიმებზე“, - განაცხადა დალიჩმა.
ხორვატია წლევანდელ მუნდიალს 1/16 ფინალში პორტუგალიასთან ბოლო წუთებზე 2-1 მარცხით დაემშვიდობა.
