საქართველოს 18-წლამდელთა ჩემპიონატი საინტერესო და უხვქულიანი შეხვედრებით დაიწყო.
ტურის ცენტრალური მოვლენა კი 16 წლის პერსპექტიული უკანახაზელის, ანდრია ჭკადუას შთამბეჭდავი პერფორმანსი გახდა, რომელმაც ვინგსისა და ლეველ აფის დაპირისპირებაში ნამდვილი შოუ მოაწყო.
ვინგსმა მეტოქეს შანსი არ დაუტოვა და დამაჯერებლად, 109:81 დაამარცხა. გამარჯვებულთა რიგებში შეუჩერებელი იყო ასაკობრივი ნაკრების წევრი ანდრია ჭკადუა.
მან მოედანზე გატარებულ 25 წუთში 16-დან 11 სამქულიანი ჩააგდო, შეხვედრა კი 37 ქულით, 3 პასითა და 2 ჩაჭრით დაასრულა (მარგი ქმედების კოეფიციენტი - 33).
განსაკუთრებით გამორჩეული მისი თამაში მესამე პერიოდში იყო, სადაც ახალგაზრდა კალათბურთელმა 6 ზუსტი შორისი ტყორცნა შეასრულა და გუნდს ერთ მეოთხედში 20 ქულა მოუტანა.
რაც შეეხება ტურის სხვა შეხვედრებს: ორბმა მართვე დაამარცხა (86:73), აკადემიამ მეგა (110:87), ჰიუნდაიმ ქუთაისი (99:77), ზაზა ფაჩულიას აკადემიამ სტუმრად აჭარის ნაკრები (82:57), რუსთავმა დაძაბულ ბრძოლაში ვიქტორ სანიკიძის აკადემია (89:87), ხოლო ბრუკლინმა თბილისი ბასკეტი (79:70).
