თურქული ფენერბაჰჩე ზამთრის სატრანსფერო ფანჯრისთვის შემადგენლობის გაძლიერებას გეგმავს და პრიორიტეტულ სამიზნეთა სიაში იტალიური ფროზინონეს ქართველი შემტევი, გიორგი კვერნაძე შეიყვანა.
გავრცელებული ინფორმაციით, სტამბოლური კლუბი 23 წლის ფეხბურთელს იანვარში ოფიციალური წინადადებით იმ შემთხვევაში მიმართავს, თუ ის მანამდე მოქმედ კონტრაქტს არ გაახანგრძლივებს.
იანვარში სამი პოზიციის გაძლიერებაზე ორიენტირებულმა ფენერბაჰჩემ სკაუტების ანგარიშის საფუძველზე მარცხენა გარემარბის ძიება გაააქტიურა და არჩევანი კვერნაძეზე შეაჩერა. ქართველი ფეხბურთელის ხელშეკრულებაში გამოსასყიდ თანხად 4 მილიონი ევროა მითითებული. ფროზინონეს ხელმძღვანელობა ცდილობს, მოთამაშესთან კონტრაქტი განაახლოს, რათა ის აღნიშნულ ფასად არ დაკარგოს, ფენერბაჰჩე კი მოვლენების განვითარებას ელოდება.
ახალგაზრდა ქართველი შემტევის მიმართ ინტერესს ევროპის სხვა წამყვანი ლიგების კლუბებიც იჩენენ. არსებული ცნობებით, კვერნაძეს იტალიური რომა და ინგლისური ევერტონიც აკვირდებიან, რასაც თურქული კლუბის ხელმძღვანელობა ტრანსფერის მზადების პროცესში ითვალისწინებს.
კვერნაძე, რომლის ძირითადი პოზიცია მარცხენა ფლანგია, წარმატებით თამაშობს მარჯვენა გარემარბად და ცენტრალურ თავდამსხმელადაც. ფიზიკური მონაცემებითა და მეორე სართულზე ეფექტური თამაშით გამორჩეულმა ფეხბურთელმა მიმდინარე სეზონში ფროზინონეს მაისურით ჩატარებულ 12 მატჩში 5 გოლი გაიტანა და 6 საგოლე გადაცემა შეასრულა.