ფინალი ინგლისელთან წააგო - ლიზა ლობჟანიძე ევროპის ვიცე-ჩემპიონია

მონტენეგროში მიმდინარე კრივის 15-წლამდე ევროპის ჩემპიონატზე, ლიზა ლობჟანიძემ ვიცე-ჩემპიონის სტატუსი მიიღო.

66 კგ. წონით კატეგორიის ფინალში, ქართველმა მოკრივემ ინგლისელ რუბი-ჯო დოს სანტოსის წინააღმდეგობა ვერ დასძლია და ვერცხლის მედალს დაეუფლა.

საქართველოს ნაკრებმა ტურნირზე ოფიციალურად მე-5 მედალი გაიფორმა - ბრინჯაოს მედლები მოიპოვეს თორნიკე სიმონიშვილმა (40 კგ.), საბა კერძევაძემ (44 კგ.) და ჯონი ხაბურზანიამ (46 კგ.), ხოლო ელენე ქარჩავა (48 კგ.) ევროპის ჩემპიონი გახდა და ქართული კრივის ისტორიაში ახალი ფურცელი ჩაწერა - პირველი ქართველი ევროპის ჩემპიონი ქალია.

საქართველოს ნაკრებს კიდევ 4 მედალი აქვს განაღდებული, რადგან ფინალში არიან და ოქროს მოგებას შეეცდებიან: გიორგი ახვლედიანი (52 კგ.), დავით ალიხანაშვილი (54 კგ.), ალექსი გუნია (60 კგ.) და გიგი არჩაია (70 კგ.).

საქართველოს 15-წლამდე ნაკრები ევროპირველობაზე 14 სპორტსმენით იყო წარმოდგენილი და ტურნირს, ყველა ვარიანტში, 9 მედლით დაასრულებს.