ევროპისა და სამხრეთ ამერიკის ჩემპიონების დაპირისპირება, რომელიც არგენტინისა და ესპანეთის ნაკრებებს შორის უნდა გამართულიყო, ჩაშლის პირასაა. მიზეზი ახლო აღმოსავლეთში დაწყებული ფართომასშტაბიანი სამხედრო კონფლიქტია.
მატჩი 27 მარტს, კატარში იყო დაგეგმილი. თუმცა, სპარსეთის ყურის რეგიონში მდებარე ამერიკულ ბაზებზე ირანის მიერ განხორციელებული იერიშების გამო (რაც აშშ-ისა და ისრაელის დარტყმების საპასუხო რეაქციაა), უსაფრთხოების გარანტიები აღარ არსებობს.
ამ ეტაპზე ფიფა (FIFA) ადასტურებს, რომ ერთადერთი ოფიციალური დოკუმენტი კატარის ფეხბურთის ასოციაციის განცხადებაა, რომლის მიხედვითაც, ქვეყანაში ყველა სპორტული ღონისძიება დროებით შეჩერებულია. სხვა კონკრეტული გადაწყვეტილება მატჩის ბედთან დაკავშირებით ჯერ არ მიღებულა.
ფინალისიმას ჩატარების საკითხი უახლოეს დღეებში საბოლოოდ გადაწყდება. თუმცა, ექსპერტების პროგნოზით, არსებული დაძაბულობის ფონზე, ალბათობა იმისა, რომ თამაში დათქმულ დროსა და ადგილას შედგეს, უკიდურესად დაბალია.
ორგანიზატორებს მოუწევთ ან მატჩის თარიღის შეცვლა, ან მისი სხვა კონტინენტზე გადატანა.
