პორტუგალიაში ქართული დერბი ქოჩორას გუნდმა მოიგო - ორივე ქართველმა ითამაშა

პორტუგალიის ჩემპიონატის მე-7 ტურში ქართული დერბი გაიმართა - ნოდარ ლომინაძის ეშტორილმა გიორგი ქოჩორაშვილის სპორტინგს უმასპინძლა.

გამარჯვება ქვეყნის მოქმედმა ჩემპიონმა მინიმალური ანგარიშით 1:0 მოიპოვა - მატჩის ერთადერთი გოლი მე-12 წუთზე ლუის სუარესმა გაიტანა.

ორივე ქართველმა ნახევარმცველმა შეხვედრა თადარიგში დაიწყო და მოედანზე მეორე ტაიმში გამოვიდა.

ქოჩორაშვილი მეორე ნახევრის დასაწყისშივე გამოჩნდა მინდორზე, ლომინაძე კი 64-ე წუთზე.

ერთ ტაიმში ქოჩორა ბურთს 38-ჯერ შეეხო, 31-დან 29 პასი ზუსტად შეასრულა (94%) და სამი ორთაბრძოლიდან ორში გამარჯვებული გამოვიდა. გამოცემა SofaScore-მ მას 6.8 შეფასება დაუწერა.

ლომინაძემ 26 წუთში ბურთთან 16-ჯერ მოასწრო შეხება და 7-დან 5 პასი ზუსტად შეასრულა (71%). 4 ორთაბრძოლიდან ქართველი გამარჯვებული ასევე ორჯერ გამოვიდა და 6.6 შეფასება დაიმსახურა.

სპორტინგმა 18 ქულა დააგროვა და ცხრილს მინიმუმ პორტუს მატჩამდე ჩაუდგა სათავეში, ეშტორილის ანგარიშზე კი კვლავ 1 გამარჯვება და 5 ქულაა.