ფოტო: ლივერპულმა ჟოტას და მის ძმას მემორიალი გაუხსნა

ლივერპულმა ენფილდის სტადიონთან დიოგუ ჟოტასა და მისი ძმის, ანდრე ტეიშეირა და სილვას (რომელიც პორტუგალიის მეორე ლიგის პენაფილში თამაშობდა) ხსოვნისადმი მიძღვნილი მუდმივი მემორიალი, სახელწოდებით Forever 20 გახსნა.

2025 წლის 3 ივლისს ძმები ესპანეთში მომხდარ ავტოკატასტროფაში ტრაგიკულად დაიღუპნენ. ტრაგედიიდან ზუსტად ერთი წლის თავზე კი, სტადიონის გვერდით, 97-ე ავენიუზე, სკულპტორ ემა როჯერსის ავტორობით შექმნილი ინსტალაცია გამოჩნდა.

„მემორიალი Forever 20 არის ემოციური პატივისცემა ძმების მიმართ, რომლებიც ერთი წლის წინ ავარიაში ტრაგიკულად დაიღუპნენ. ხელოვანმა ემა როჯერსმა მემორიალი კლუბთან შეთანხმებით შექმნა, რითაც პატივი მიაგო მათ სიცოცხლეს, ძმურ კავშირსა და მნიშვნელობას გულშემატკივრებისთვის.

ცენტრში განთავსებულია გულის ფორმის სკულპტურა, რომელიც დიოგუს მიერ გოლის აღნიშვნის კულტოვან ჟესტს მოგვაგონებს. სხვადასხვა კუთხიდან ასევე ჩანს ციფრები 20 და 30, რომლებიც მათ სათამაშო მაისურებს ამშვენებდა. მონუმენტზე დატანილია ჟოტას შესახებ შექმნილი იმ ცნობილი სიმღერის ტექსტიც, რომელსაც ლივერპულის ქომაგები გასულ სეზონში ყოველი მატჩის მე-20 წუთზე მღეროდნენ.

აქვე ნახავთ PlayStation-ის ჯოისტიკსაც, რომელიც დიოგუს ვიდეო თამაშებისადმი სიყვარულს სიმბოლიზირებს.

მემორიალის საფუძვლად იქცა ის ნივთები (შარფებისა და მაისურების ფრაგმენტები), რომლებიც გულშემატკივრებმა 2025 წლის ივლისში, ტრაგედიის დღეებში ენფილდთან დატოვეს“, - ნათქვამია ლივერპულის ოფიციალურ განცხადებაში.