ფრანგულ-ესპანური დაპირისპირების ისტორია

მსოფლიო თასის პირველ ნახევარფინალურ მატჩში ესპანეთი საფრანგეთს დაუპირისპირდება. დღევანდელ ბლოგში ამ ნაკრებების დაპირისპირების ისტორიას შემოგთავაზებთ.

ესპანეთისა და საფრანგეთის ნაკრებებს ერთმანეთში არაერთხელ უთამაშიათ, მათ შორის 26-ჯერ გუნდები ერთმანეთს ამხანაგურ მატჩში დაუპირისპირდნენ, საიდანაც 7-ჯერ ფრანგებმა იმარჯვეს, 14-ჯერ ესპანელებმა, ხოლო 5 შემთხვევაში შეხვედრა ფრედ დასრულდა. 

ყველაფერი სხვანაირადაა, როცა საქმე ოფიციალურ შეხვედრებს ეხება - ამ მხრივ უპირატესობა ფრანგების მხარესაა. 12 მატჩიდან ფრანგებმა 6 მოიგეს, ესპანელებმა კი 4, 2 მატჩი ფრედ დასრულდა. დღევანდელ ბლოგში ლურჯებისა და წითლების იმ დაპირისპირებებზე მოგიყვებით, რომლებიც ისეთ ტურნირებზე შედგა, როგორებიც ევროპისა და მსოფლიო ჩემპიონატები და ერთა ლიგაა.

პირველი ესპანურ-ფრანგული ოფიციალური დაპირისპირება არც მეტი და არც ნაკლები, პირდაპირ ევრო 1984-ის ფინალში შედგა - პარკ დე ფრანსზე გამართულ ფინალში საფრანგეთმა მიშელ პლატინისა და ბრუნო ბალონეს გოლებით იმარჯვა და პირველად იზეიმა ევროპის ჩემპიონობა.

საფრანგეთი 2:0 ესპანეთი. ევრო 1984.

1984 წლის ფინალისტები 12 წლის შემდეგ ერთმანეთს ისევ ევროზე შეხვდნენ, ამჯერად ჯგუფში - ელან როუდზე გამართული შეხვედრა ფრედ 1:1 დასრულდა. ფრანგებიდან იური ჯორკაეფმა გაიტანა, ესპანელებიდან ხოსე ლუის კამინერომ. ჯგუფიდან გასვლა ორივე ნაკრებმა შეძლო.

ოთხ წელიწადში ნაცნობი მეტოქეები კვლავ ევროზე გადაეყარნენ,  ამჯერად არც ჯგუფში და არც ფინალში - ხოსე ანტონიო კამაჩოსა და როჟერ ლემერის შეგირდები ერთმანეთს ტურნირის მეოთხედფინალში დაუპირისპირდნენ. გამარჯვება მომავალ ჩემპიონს, საფრანგეთს დარჩა - ლურჯებმა ზინედინ ზიდანისა და იური ჯორკაეფის გოლებით მოიგეს. ესპანელთაგან ერთადერთი გოლი გაიზკა მენდიეტამ გაიტანა.

საფრანგეთი 2:1 ესპანეთი. ევრო 2000.

მუნდიალზე ესპანურ-ფრანგული დაპირისპირება ერთადერთხელ, 2006 წლის მერვედფინალში შედგა. ჰანოვერში ანგარიში დავიდ ვილამ პენალტის ნიშნულიდან გახსნა - ტაიმის მიწურულს ანგარიში ფრანკ რიბერიმ გაათანაბრა. მატჩის 84-ე წუთზე პატრიკ ვიერას თავური სერხიო რამოსმა აისხლიტა - ბურთი იკერ კასილასის კარში აღმოჩნდა. მატჩის საბოლოო ანგარიში კი ზინედინ ზიდანმა დააფიქსირა - კარლეს პუიოლის ბრწყინვალედ ჩამოტოვების შემდეგ, ათიანმა იკერს ახლო კუთხეში გაუტანა. საფრანგეთი საბოლოოდ ფინალში გავიდა, სადაც იტალიასთან პენალტების სერიაში დამარცხდა.

საფრანგეთი 3:1 ესპანეთი. მუნდიალი 2006.

ლე ბლუსა და ფურია როხას გზები ექსი წლის შემდეგ დონეცკში, ევრო 2012-ის მეოთხედფინალში გადაიკვეთა - მომავალმა ჩემპიონებმა ლორან ბლანის გუნდი 2:0 დაამარცხეს. ორივე გოლი ჩაბი ალონსოს ანგარიშზეა - პირველ შემთხვევაში ესპანელმა ხორდი ალბას ჩაწოდების შემდეგ ბურთი ლორისის კარში თავური დარტყმით გადაგზავნა, მატჩის მიწურულს კი საყრდენმა პედროს მოპოვებული თერთმეტმეტრიანი გამოიყენა. 

საფრანგეთი 0:2 ესპანეთი. ევრო 2012.

2018 წელს უეფას ერთა ლიგის გათამაშება დაიწყო - პირველი გამარჯვებული პორტუგალია გახდა, 2020/21 წლების სეზონის ფინალში კი ერთმანეთს დიდიერ დეშამის საფრანგეთი და ლუის ენრიკეს ესპანეთი დაუპირისპირდნენ. მიუხედავად იმისა, რომ სან სიროზე ანგარიში 64-ე წუთზე მიკელ ოიარსაბალმა გახსნა, ფრანგებმა მატჩის შემოტრიალება შეძლეს - 66-ე წუთზე კარიმ ბენზემას გამათანაბრებელ გოლს, მე-80 წუთზე კილიან მბაპეს გამარჯვების მომტანი დარტყმა მოჰყვა. ერთა ლიგის მეორე ტრიუმფატორები ლურჯები გახდნენ.

საფრანგეთი 2:1 ესპანეთი. ერთა ლიგა 2021.

ფრანგებისა და ესპანელების ბოლო ორი მატჩი წარმატებული წითელი მხარისთვის აღმოჩნდა - ევრო 2024-ის ნახევარფინალურ მატჩში დეშამისა და დე ლა ფუენტეს შეგირდები ერთმანეთს ალიანს არენაზე დაუპირისპირდნენ. შეხვედრაში ანგარიში რანდალ კოლო მუანიმ მე-8 წუთზე, კილიან მბაპეს ჩაწოდების შემდეგ გახსნა. ფრანგებს შესანიშნავი გასროლით 16 წლის ლამინ იამალმა უპასუხა, ახალგაზრდა ესპანელის გოლიდან ოთხ წუთში ფურია როხა წინ დანი ოლმომ გაიყვანა. მატჩში მეტი გოლი აღარ გასულა - ესპანეთმა შემდეგ გერმანია დაამარცხა, ფინალში კი ინგლისის ნაკრებს სძლია.

საფრანგეთი 1:2 ესპანეთი. ევრო 2024.

ერთა ლიგის ბოლო გათამაშების ფინალში ესპანეთი პორტუგალიასთან დამარცხდა, ნახევარფინალში დე ლა ფუენტეს შეგირდებმა ფეიერულ მატჩში საფრანგეთი დაამარცხეს. შტუტგარტში გამართულ შეხვედრაში ესპანელები მეტოქეს 55-ე წუთისთვის 4:0 ანადგურებდნენ - გოლები ნიკო ვილიამსმა, მიკელ მერინომ, ლამინ იამალმა და პედრიმ გაიტანეს. ერთი ბურთი კილიან მბაპემ გაქვითა - ფრანგის თერთმეტმეტრიანი ზუსტი აღმოჩნდა - 4:1, რასაც რვა წუთში ლამინის კიდევ ერთი გოლი მოჰყვა. თითქოს დამთავრებულ თამაშში ფრანგებმა კიდევ სამჯერ გაიტანეს - 93-ე წუთზე კოლო მუანმა ანგარიში მინიმუმამდე შეამცირა. ფრანგებს გათანაბრებისთვის დრო აღარ ეყოთ 5:4.

საფრანგეთი 4:5 ესპანეთი. ერთა ლიგა 2025.

მსოფლიო ჩემპიონატების ისტორიაში მეორე ესპანურ-ფრანგული დაპირისპირება სამშაბათს, 14 ივლისს, თბილისის დროით 23:00-ზე, დალასში გაიმართება.