ქაოსი და ხელჩართული ბრძოლა აიბროქსზე: სელტიკის გამარჯვება ჩხუბმა დაჩრდილა

სელტიკის დრამატული გამარჯვება რეინჯერსთან, შოტლანდიის თასის მეოთხედფინალში, მასობრივმა არეულობამ დაჩრდილა.

აიბროქსის სტადიონზე მატჩისშემდგომი პენალტების სერიის დასრულებისთანავე, ორივე გუნდის ქომაგები მოედანზე შეიჭრნენ, ერთმანეთს მაშხალები და სხვადასხვა საგნები დაუშინეს. ვითარების განსამუხტად პოლიციისა და სტიუარდების დიდი ძალების მობილიზება გახდა საჭირო.

აღსანიშნავია, რომ ბოლო ათწლეულის განმავლობაში ეს იყო პირველი დერბი, რომელზეც სტუმარი გუნდის ამდენი გულშემატკივარი (7 500 კაცი) დაუშვეს. გადამწყვეტი პენალტის გატანის შემდეგ, ასეულობით ფანი მოედანზე აღმოჩნდა, რასაც რეინჯერსის მხარდამჭერების მხრიდანაც ანალოგიური ქმედება მოჰყვა. შოტლანდიის ფეხბურთის ასოციაციამ მომხდარი მკაცრად დაგმო და დაუყოვნებლივ დაიწყო გამოძიება.

სელტიკის მწვრთნელი, მარტინ ონილი, თავად აღმოჩნდა ამ ქაოსის ეპიცენტრში, როცა ფეხბურთელების მოედნიდან გაყვანას ცდილობდა.

„სამწუხაროა, რაც მოხდა. იმედია, ეს ფაქტი ჩემი გუნდის ბრწყინვალე თამაშს არ დაჩრდილავს. 10 დღეში მეოთხე მატჩი ჩავატარეთ და ბიჭებმა მოედანზე ყველაფერი დატოვეს. ძველი ფირმის გერბი ყოველთვის ფეთქებადი თამაშია და ალბათ ამიტომაცაა მსოფლიოში ერთ-ერთი საუკეთესო დერბი“, — განაცხადა ონილმა.

რეინჯერსის თავკაცმა, დანი როლმა კი აღნიშნა, რომ ჩხუბი არ უნახავს, რადგან მოედანი მალევე დატოვა, თუმცა დასძინა, რომ მსგავსი სცენები ფეხბურთს არ უხდება.