უზბეკეთის დედაქალაქ ტაშკენტში სტარტი აიღო ძიუდოში იუნიორთა მსოფლიო ჩემპიონატმა, სადაც საქართველოს ახალგაზრდული ნაკრებიც გამოდის.
ტურნირის პირველ დღეს მედლები -60 და -66 კგ წონით კატეგორიებში თამაშდება, სადაც ჩვენმა გუნდმა ერთი ბრინჯაოს მედალი უკვე გაინაღდა.
განაღდებული მედალი -66 კილოგრამ წონით კატეგორიას უკავშირდება, სადაც მესამე ადგილისთვის ბრძოლაში ორი ქართველი - თორნიკე გიგაური და საბა საბაშვილი ერთმანეთს დაუპირისპირდებიან. საბაშვილმა ნახევარფინალამდე შესანიშნავად იასპარეზა (იაპონელ, ყირგიზ და რუს მეტოქეებს სძლია), თუმცა ფინალში გადასასვლელ შეხვედრაში ისრაელის წარმომადგენელ ტომ სიმახოვთან დამატებით დროში დამარცხდა. გიგაურმა კი, თავის მხრივ, მეოთხედფინალში განცდილი მარცხის შემდეგ, რეპეშაჟში ტაჯიკი იოსინ ბობოკალონოვი დაამარცხა და ბრინჯაოსთვის ბრძოლის უფლება მოიპოვა.
მედლის მოპოვების რეალური შანსი აქვს ლუკა ომანაძესაც (-60 კგ). ქართველმა ძიუდოისტმა ინდოელი და აზერბაიჯანელი მეტოქეების ბარიერი წარმატებით დაძლია, თუმცა მეოთხედფინალში ტაჯიკ სპორტსმენთან დათმო შეხვედრა. მიუხედავად ამისა, რეპეშაჟში ვინისიუს ოლივეირას ძლევით, ომანაძემ მესამე ადგილისთვის ბრძოლის საგზური მოიპოვა და გადამწყვეტ შეხვედრაში ეგვიპტელ იასინ საბრაჰს დაუპირისპირდება.
ფინალური ბლოკის შეხვედრები 16:00 საათზე დაიწყება.