ევროპის წამყვან სარაგბო ჩემპიონატებში ქართველი ლეგიონერები მორიგი შედეგიანი მატჩებით გამოირჩნენ.
საფრანგეთის TOP 14-ის მე-7 ტურში ქართველმა მორაგბეებმა როგორც ფრანგულ კლუბებში, ისე ინგლისის პრემიერ ლიგაში თავი მნიშვნელოვანი ლელოებით გამოიჩინეს.
საფრანგეთში ყველაზე დაძაბული და შედეგიანი დაპირისპირება იოანე იაშაღაშვილისა და მიხეილ ალანიას ვანსა და გიორგი ახალაძისა და გიორგი ძმანაშვილის კლერმონს შორის შედგა, სადაც მასპინძლებმა მინიმალური სხვაობით, 27:26 გაიმარჯვეს.
მატჩში აქტიურად ჩაერთვნენ ქართველი მორაგბეები. იოანე იაშაღაშვილმა, რომელიც მოედანზე 38-ე წუთზე გამოჩნდა, მიმდინარე სეზონში პირველი ლელო მიითვალა, ხოლო კლერმონის რიგებში თავი გიორგი ძმანაშვილმა გამოიჩინა, რომელმაც 47-ე წუთზე მექანიკურად ზუსტი და შედეგიანი შეტევა ლელოთი დაასრულა.
კიდევ ერთ ფრანგულ მატჩში ბექა გიგაშვილისა და მიხეილ შიოშვილის ტულონმა გათამაშების ერთ-ერთ ლიდერს, ბექა გორგაძის, ალექსანდრე ყაულაშვილისა და გურამ პაპიძის პოს უმასპინძლა და დამაჯერებლად, 41:20 სძლია.
ტულონელთა მკვეთრ უპირატესობაში საკუთარი წვლილი შეიტანა ბექა გიგაშვილმაც, რომელმაც თამაშში ჩართვიდან სულ რამდენიმე წუთში, 52-ე წუთზე, მეტოქის ლელო აიღო.
წარმატებული უქმეები ჰქონდათ ქართველებს ინგლისშიც. ლუკა ივანიშვილის ბრისტოლმა ბაჩუკი ჭუმბაძისა და ნიკა აბულაძის ექსეტერს უმასპინძლა და 20:7 დაამარცხა.
ლუკა ივანიშვილმა მსაჯის მიერ კომპენსირებულ დროში, ბრწყინვალე რეიდი ლელოთი დააგვირგვინა.
