საქართველოს საფეხბურთო ნაკრების ყოფილი კაპიტნის, გიორგი ნემსაძის ხსოვნის უკვდავსაყოფად თბილისის იბერიამ მნიშვნელოვანი ინიციატივები დააანონსა.
ამის შესახებ საქართველოს პირველ არხთან კლუბის პრეზიდენტმა ტარიელ ხეჩიკაშვილმა ისაუბრა.
დიღომში არსებული გუნდისა და აკადემიის ახალი საფეხბურთო ბაზის მშენებლობის ფარგლებში, გადაწყდა, რომ იბერიას აკადემიის მთავარ სტადიონს გიორგი ნემსაძის სახელი მიენიჭება.
გარდა ამისა, კლუბი გეგმავს საერთაშორისო ტურნირის ნემსას თასის აღდგენას, ხოლო სპორტის და ახალგაზრდობის საერთაშორისო ფონდი რეგიონებში ნიჭიერ ფეხბურთელებს შეარჩევს და გიორგის სახელობის სტიპენდიას გადასცემს.
ასევე მომზადდება წიგნი საქართველოს ნაკრების ყოფილი კაპიტნის შესახებ, ხოლო თბილისის საკრებულოში შევა ინიციატივა, რომ იმ ქუჩას, სადაც გიორგი ნემსაძე ცხოვრობდა, მისი სახელი მიენიჭოს.
