ქართველი ხელბურთელები ევროპაზე ფურორს ახდენენ და ვერავინ აჩერებს

თელავში მიმდინარე ხელბურთის 18-წლამდელთა B დივიზიონის ევროპის ჩემპიონატზე, საქართველოს ნაკრები გამარჯვებათა სერიას აგრძელებს.

დიდი ბრიტანეთის, ბულგარეთისა და კვიპროსის დამარცხების შემდეგ, ჩვენმა გუნდმა კოსოვოს ნაკრებს 5-ბურთიანი სხვაობით მოუგო (35:30) და ჯგუფის ერთპიროვნული ლიდერი გახდა - კონკურენტმა ბელგიამ ბულგარეთთან წააგო.

ბენეფისი ჰქონდა ვახტანგ ხარებაშვილს, რომელმაც კოსოვოელებს 13 გოლი გაუტანა. ასევე, კიდევ ერთი სუპერ თამაში ჩაატარა გიორგი ქევხიშვილმა და, კვიპროსთან მოგერიებული 12 ბურთის შემდეგ, კოსოვოსთან 14 სეივი შეასრულა.

ხარებაშვილის გარდა, შეტევაში შედეგიანი იყვნენ ნიკოლოზ მამულაშვილი და გიორგი კაპანაძე - 7-7 გოლი გაიტანეს, ნიკოლოზ ბიბლაიამ, ალექსანდრე ბოჟაძემ საბა ბუიღლიშვილმა 2-2 ბურთი შეაგდეს, ხოლო თითო-თითოჯერ თავი ანდრია ბურჯალიანმა და ვანო გურგენიძემ გამოიჩინეს.

"აქ იოლი თამაში არავის აქვს, შედარებით თანაბარი დონის გუნდები ვართ. მომდევნო შეხვედრა ერთ-ერთ ფავორიტთან, ბელგიასთან გვაქვს. დღეს, ბელგიასთან გამარჯვებით, ბულგარეთმა დაამტკიცა, რომ არ ყოფილა ხელწამოსაკრავი მეტოქე. გამოდის, რომ მეორე ტურში საკმაოდ ძლიერი გუნდი დაგვიმარცხებია.

თუმცა, მაინც ვფიქრობ, რომ ბელგიას გამორჩეული შემადგენლობა ჰყავს, არანაკლები ბულგარეთზე. ხვალ დასვენების დღეა. სამედიცინო შტაბი ყველაფერს გააკეთებს, რომ ბიჭებმა ძალები აღიდგინონ. ჯერჯერობით, ყველა თამაში მოვიგეთ. თავდაჯერებულად, თუმცა, პარალელურად, შეცდომების აღმოფხვრაზე მუშაობით მივიწევთ წინ", - განაცხადა მატჩის შემდეგ საქართველოს 18-წლამდელთა ნაკრების მთავარმა მწვრთნელმა, შოთა თევზაძემ.

4 ტურის შედეგებით, საქართველოს 4 მოგება აქვს და ერთპიროვნული ლიდერია, ხოლო ბულგარეთსა და ბელგიას 3-3 გამარჯვება აქვთ, შემდეგ კოსოვო, დიდი ბრიტანეთი (1-1 მოგება) და კვიპროსი (ყველა წაგება) მოდიან.

7 აგვისტოს ტურნირზე დასვენების დღეა, ჯგუფური ეტაპის ბოლო თამაში კი გვაქვს ბელგიასთან - 8 აგვისტოს 18:15 საათიდან.