ქართველის გარეშე - ლოპოტას ტურნირზე ნახევარფინალისტები გაირკვა

სოფელ ნაფარეულში მდებარე ლოპოტა სპა რეზორტში, ქალთა საერთაშორისო საჩოგბურთო ტურნირი მიმდინარეობს.

გათამაშებაში 4 ქართველი ჩოგბურთელი მონაწილეობდა - ნიტა სხილაძე, თინათინ მთვარელიშვილი, ზოზია ქარდავა და ეკო გორგოძე.

გორგოძე საერთოდ პირველ ნომრად იყო განთესილი, თუმცა 1/8 ფინალურ შეხვედრაში დამარცხდა და მატჩის შემდეგ გაავრცელა პოსტი, რომელშიც მსაჯით უკმაყოფილებას გამოთქვამდა.

ტურნირზე უკვე 1/2 ფინალური ეტაპის ჯერია და ტიტულისთვის ბრძოლას 4 მოთამაშე აგრძელებს. რუსეთის სახელით მოასპარეზე ალექსანდრა შუბლაძე (WTA-ის 240-ე ნომერი) პოლონელ მარტინა კუბკას (285-ე) შეხვდება, ხოლო ამერიკელი ვივიან ვოლფი (294-ე) ფრანგ ამანდინ ჰესეს (416-ე) დაუპირისპირდება.

ლოპოტას ტურნირის დირექტორი მაკა ჩახნაშვილია, ხოლო გათამაშების საპრიზო ფონდი 60 000 აშშ დოლარი გახლავთ.