ქართველთა წარმატებები - ანა ჯაფარიძის საოცარი სტატისტიკა

პარიზში გამართული პარატაეკვონდოს გრანპრი ქართველი სპორტსმენებისთვის განსაკუთრებით წარმატებული გამოდგა.

ანა ჯაფარიძემ 52 კილოგრამ წონით კატეგორიაში ბრწყინვალედ იასპარეზა. რუსი მარია ფისენკოსა და სერბი მარია მიჩევის ბარიერის დაძლევის შემდეგ, ფინალში თურქი მერიემ ჩავდარი დაამარცხა და ოქროს მედალს დაეუფლა.

ამ გამარჯვებით ჯაფარიძემ მსოფლიო რეიტინგში მონღოლ სურენჟავ ულამბაიარს გადაასწრო და პირველი ადგილი დაიკავა, რაც ნოემბერში სამხრეთ კორეაში დაგეგმილი მსოფლიო ჩემპიონატის წინ უდიდესი განაცხადია.

ტურნირზე წარმატებით გამოვიდა ლიკა ჩაჩიბაიაც, რომელმაც ბრაზილიელ კრისტიანა ნასიმენტოს სძლია და ბრინჯაოს მედალს დაეუფლა.

აღსანიშნავია ანა ჯაფარიძის სტატისტიკაც. კარიერაში ჩატარებული 13 საერთაშორისო ტურნირიდან მან ცამეტივეჯერ მოახერხა ფინალში გასვლა და საქართველოს 8 ოქროს მედალი მოუტანა.