პრემიერ ლიგის ყოფილმა მსაჯმა განაცხადა, რომ VAR სისტემა თავის დანიშნულებას ვერ ასრულებს და დასძინა, რომ ფასი, რომელსაც მეტი სიზუსტისთვის იხდიან, ზედმეტად მაღალია.
გრემ სკოტი პრემიერ ლიგაში ათ წელზე მეტი ხნის განმავლობაში მსაჯობდა და 2025 წელს პენსიაზე გასვლამდე 400-ზე მეტ მატჩს გაუძღვა.
გამოცემა The Athletic-ისთვის დაწერილ თავის ახალ სვეტში სკოტი აღწერს, რომ ვიდეო რეფერის (VAR) როლში ყოფნა და ეპიზოდების გადამოწმება ხშირად ისეთ შეგრძნებას ტოვებდა, თითქოს „კედლები ვიწროვდებოდა“.
გასულ თვეში ფეხბურთის გულშემატკივართა ასოციაციის (FSA) მიერ ჩატარებულმა გამოკითხვამ აჩვენა, რომ ფანების 75%-ზე მეტი VAR-ის გამოყენების წინააღმდეგია, ხოლო 90%-ზე მეტი მიიჩნევს, რომ სისტემა სტადიონზე მატჩის ყურების სიამოვნებას აქვეითებს.
გამოკითხული გულშემატკივრების დაახლოებით 85%-მა აღნიშნა, რომ VAR-მა და გადაწყვეტილების მიღების ხანგრძლივმა პროცესმა ფეხბურთი ნაკლებად სასიამოვნო გახადა. ამ მოსაზრებას ყოფილი მსაჯიც იზიარებს.
სკოტმა განაცხადა:
მსაჯებიც ადამიანები არიან და ისინიც გრძნობენ იმ ტკივილს, რასაც ვიდეო რეფერირების სისტემა აყენებს ფეხბურთს, რომელიც უბრალოდ არ ვარგა. ჩვენ არანაირ სიამოვნებას არ გვანიჭებს გოლების გაუქმება მხოლოდ იმიტომ, რომ მოთამაშის შუბლი, მუხლი ან ცერი თამაშგარე მდგომარეობაში აღმოჩნდა. ჩვენც გვძულს სიცივესა და წვიმაში დგომა, სანამ კოლეგა პოტენციური პენალტის ან უხეშობის ფორენზიკულ ანალიზს ატარებს.
მიუხედავად ფანების მრავალწლიანი უკმაყოფილებისა, პრემიერ ლიგა აცხადებს, რომ VAR არსად არ წავა. მეტიც, ფეხბურთის კანონმდებლები მისი გამოყენების არეალის გაფართოებასაც განიხილავენ.
„პრემიერ ლიგის კვლევები აჩვენებს, რომ ფანების უმეტესობა VAR-ის შენარჩუნების მომხრეა, თუმცა მისი გამოყენების წესების გაუმჯობესებას ითხოვს,“ - ნათქვამია ლიგის განცხადებაში.
