ხუთი გავლენიანი რეპორტიორი ერთხმად საუბრობს არნე სლოტის ბედზე და იმაზე, აპირებს თუ არა ლივერპული კრიტიკის ქარცეცხლში მყოფი ნიდერლანდელის გათავისუფლებას.
სლოტმა ვერ შეძლო გუნდის ათამაშება - ერთადერთი გამონაკლისი დომინიკ სობოსლაია. მიუხედავად იმისა, რომ თავიდან გულშემატკივრები მწვრთნელს მხარს უჭერდნენ, ბოლო დროს მათი მოთმინების ფიალა აივსო. გასულ უქმეებზე ეტიჰადზე მყოფმა 8 000-იანმა საგულშემატკივრო არმიამ სტადიონი მატჩის დასრულებამდე ბევრად ადრე დატოვა.
სლოტის მდგომარეობას კიდევ უფრო ამძიმებს ის ფაქტი, რომ ბაზარზე ჩაბი ალონსო გამოჩნდა. ალონსო ენფილდზე ღმერთად ჰყავთ შერაცხული, ბაიერ ლევერკუზენში მისმა მუშაობამ და ისტორიულმა საჩემპიონო ტიტულმა კი ყველა აღაფრთოვანა. მართალია, რეალ მადრიდში მისი ხანმოკლე მოღვაწეობა ისე არ წარიმართა, როგორც ელოდნენ, თუმცა მისი სტატისტიკა მაინც შთამბეჭდავია (70.59% მოგება).
მიუხედავად იმისა, რომ ნაკლებად სანდო მედიასაშუალებები სლოტის წასვლაზე მუდმივად სპეკულირებენ, ყველაზე ავტორიტეტული წყაროები საპირისპიროს ამტკიცებენ - სლოტი მომავალ წელსაც გუნდის სათავეში იქნება.
ჯეიმს პირსი (The Athletic): „გადაწყვეტილების მიმღებ პირებს კვლავ სჯერათ მისი. მათ სწამთ, რომ ზაფხულში სწორი დამატებებით სლოტი შეძლებს სიტუაციის გამოსწორებას, ისევე როგორც იურგენ კლოპმა გააკეთა 2022-23 წლების იმედგაცრუების შემდეგ.“
პოლ ჯოისი (The Times): ალბათ ყველაზე სანდო წყარო ლივერპული საკითხებში. ის ამბობს, რომ სლოტს ჯერ კიდევ აქვს ავტორტიტეტი მოგებული ტიტულის გამო. მიუხედავად იმისა, რომ ალონსო მის მთავარ შემცვლელად მიიჩნევა, კლუბის შიდა წრეებში ამაზე ჯერ არ ფიქრობენ.
ფაბრიციო რომანო: იტალიელი ინსაიდერი ამტკიცებს, რომ კლუბის მენეჯმენტს არცერთ მომენტში არ განუხილავს სლოტის გათავისუფლება. „მესიჯი ყოველთვის იყო მხარდაჭერა და ნდობა. ლივერპული მწვრთნელს ბოლომდე უდგას მხარში.“
გრემ ბეილი: ჩვენი ინსაიდერის თქმით, თავად სლოტიც სრულიად დარწმუნებულია, რომ მომავალ სეზონსაც ლივერპულში დაიწყებს და კლუბისგან საპირისპირო სიგნალი არ მიუღია.
სემ უოლესი (The Telegraph): ჟურნალისტმა გამოაქვეყნა სტატია სათაურით: „ლივერპულს სურს, რომ არნე სლოტი მომავალ სეზონშიც მწვრთნელად დარჩეს“. მისი თქმით, მფლობელებს (FSG) სჯერათ, რომ ოთხშაბათის მარცხის მიუხედავადაც, სლოტი გუნდს წარმატებამდე მიიყვანს.
როგორც ჩანს, რაღაც საოცრება უნდა მოხდეს სეზონის ბოლომდე, რომ ლივერპულმა მომავალ წელს ახალი მწვრთნელი დანიშნოს.
