,,ყველა მოსაზრებას ყურადღებით მოვუსმინეთ" - ინფანტინოს განცხადება

ჯანი ინფანტინომ, მასშტაბური კრიტიკისა და ეროვნული ფედერაციების არასაკმარისი მხარდაჭერის ფონზე, FIFA Forward Enterprise (FFE)-ის პროექტზე უარი თქვა.

ამ გადაწყვეტილებას წინ უძღოდა საგანგებო შეხვედრების დღე, რომლის დროსაც ინფანტინოს აცნობეს, რომ პროექტის მიმართ უარყოფითად განეწყვნენ როგორც ეროვნული ფედერაციები, ისე მისი პოტენციური ფინანსური პარტნიორები, მათ შორის მისი რამდენიმე ყველაზე ახლო მოკავშირეც.

„FIFA Forward Enterprise-ის პროექტი მიზნად ისახავდა ჩვენი წევრი ასოციაციების და მსოფლიო ფეხბურთის კიდევ უფრო გაძლიერებას, განსაკუთრებით იმ ქვეყნებში, სადაც მხარდაჭერა ყველაზე მეტად არის საჭირო. თავიდანვე ვამბობდით, რომ ეს მხოლოდ იმ შემთხვევაში განხორციელდებოდა, თუ FIFA-ს წევრი ასოციაციების უმრავლესობა მხარს დაუჭერდა პროექტს და ის სრულფასოვანი კონსულტაციების პროცესს გაივლიდა წევრ ასოციაციებთან, FIFA-ს საბჭოსთან, კონფედერაციებთან და სხვა დაინტერესებულ მხარეებთან.

ყველა მოსაზრების ყურადღებით მოსმენის შემდეგ ცხადი გახდა, რომ პროექტმა ისეთი ტიპის განხეთქილება გამოიწვია, რომელიც, მხარდაჭერის დონის მიუხედავად, აღარ შეესაბამება იმ მიზანს, რომლისთვისაც იგი შეიქმნა.

ჩვენი მიზანი ყოველთვის იყო და იქნება გაერთიანება და განვითარება. ამიტომ ეს წინადადება აღარ განხორციელდება.

მომავალ დღეებსა და კვირებში ჩემი მიზანია, ყველა დაინტერესებული მხარე კვლავ ერთ მაგიდასთან შევკრიბო საერთო ინტერესების სულისკვეთებით, რათა ფეხბურთის განვითარება გავაგრძელოთ მთელ მსოფლიოში, განსაკუთრებით კი იმ ქვეყნებში, რომლებსაც ჩვენი მხარდაჭერა ყველაზე მეტად სჭირდებათ.“ - განაცხადა ინფანტინომ.

ინფანტინოს გარემოცვაში ამტკიცებენ, რომ მას არც გადადგომა სურს და არც FIFA-ს პრეზიდენტის პოსტზე ხელახალი კენჭისყრაზე უარის თქმა.

თუმცა, თუ ინფანტინო თავად არ დატოვებს თანამდებობას, კვლავ არსებობს განზრახვა, რომ მომდევნო საპრეზიდენტო არჩევნებზე მას ძლიერი კონკურენტი დაუპირისპირდეს. ამასთან, მისი გადადგომის მოთხოვნები კვლავ ისმის, მათ შორის დიდი ბრიტანეთის პრემიერ-მინისტრის, ენდი ბერნემის მხრიდანაც.