რა თქვა ქეცბაიამ მონდორფთან მატჩისწინა პრესკონფერენციაზე

დინამო თბილისის მთავარმა მწვრთნელმა, თემურ ქეცბაიამ, კონფერენს ლიგის პირველ საკვალიფიკაციო ეტაპზე, ლუქსემბურგულ მონდორფთან საპასუხო მატჩის წინ, პრესკონფერენციაზე ისაუბრა.

"ყოველთვის ასეა, რომ დინამოს თამაში მთელ საქართველოს ეხება. იმედია, ხალხი მოვა, გულშემატკივრის გარეშე ეს თამაში ვერ წარმომიდგენია. არ აქვს მნიშვნელობა იქ რა შედეგი იყო, მინდა, მაქსიმალურად მობილიზებულები ვიყოთ და მოვიგოთ.

არ მგონია, რომ ჩემს ფეხბურთელებს გამოცდილების პრობლემა ჰქონდეთ - გვყავს როგორც გამოცდილი, ისე ახალგაზრდა ფეხბურთელები და ამით სწორედაც კარგი მიქსი იქმნება.

კანკავა, ხარაიშვილი და უგრეხელიძე ჯერ 100%-ით არ არიან იმ დონეზე, რაზეც ჩვენ და თავად უნდათ, რომ იყვნენ. გუნდთან უკვე 2 დღეა ვარჯიშობენ, მაგრამ არ მგონია, ასეთ თამაშში მონაწილეობისთვის მზად იყვნენ. იმედია, მოვიგებთ და ისინი მომდევნო შეხვედრაში გვეყოლებიან", - აღნიშნა ქეცბაიამ.

დინამოელებმა ლუქსემბურგში 2:1 მოიგეს, ხვალ კი მეტოქეს არა დინამო არენაზე, არამედ მიხეილ მესხის სახელობის სტადიონზე უმასპინძლებენ. თამაში 20:00 საათიდან დაიწყება.