გრაცის შტურმი საქართველოს ფეხბურთის ფედერაციის მიმართ უკმაყოფილებას გამოხატავს, რადგან ეროვნულ ნაკრებში მიღებული ტრავმის გამო გუნდს ოთარ კიტეიშვილი რამდენიმე კვირა ვერ დაეხმარება.
30 წლის ნახევარმცველმა დაზიანება უნგრეთის წინააღმდეგ გამართულ ერთა ლიგის შეხვედრაში მიიღო.
კლუბში დაბრუნებულ ფეხბურთელს ჩაუტარდა მაგნიტურ-რეზონანსული ტომოგრაფია, რომელმაც პესიმისტური ვარაუდი დაადასტურა. კიტეიშვილს წვივის კუნთის ტრავმა აქვს და რეაბილიტაცია უკვე დაიწყო.
გრაცული კლუბის სპორტული დირექტორი, მიხაელ პარენსენი აცხადებს, რომ ბოლო კვირების განმავლობაში ცდილობდნენ ფეხბურთელის თანდათანობით და ფრთხილად დაბრუნებას, თუმცა საქართველოს ნაკრებში მათ რეკომენდაციებს ყურადღება არ მიაქციეს და კიტეიშვილმა უნგრეთთან მატჩი სასტარტო შემადგენლობაში დაიწყო.
შეგახსენებთ, რომ მიმდინარე სეზონში ოთარ კიტეიშვილმა შტურმის ღირსება ყველა ტურნირის 4 მატჩში დაიცვა და გოლი და საგოლე პასი მიითვალა. ჯერჯერობით ასევე უცნობია მეორე ქართველი ლეგიონერის, გიზო მამაგეიშვილის მდგომარეობაც, რომელმაც ტრავმა ჩრდილოეთ ირლანდიასთან მატჩში მიიღო.
ავსტრიის ბუნდესლიგის სატურნირო ცხრილში შტურმი 11 ქულით მე-4 ადგილს იკავებს.
