რეალი ქულებს კარგავს - ტიტულისთვის ბრძოლა რთულდება

მადრიდის რეალი შაბათს საღამოს, ლა ლიგის 30-ე ტურში, სტუმრად მალიორკასთან ანგარიშით 2:1 დამარცხდა.

მადრიდის რეალმა შეტევაში მომენტები ვერ გამოიყენა, დაცვაში კი შეცდომები დაუშვა, რის გამოც შაბათს მალიორკასთან სენსაციური მარცხი (2:1) იწვნია. ამ წაგებამ გუნდის საჩემპიონო ამბიციებს ლა ლიგაში უდიდესი დარტყმა მიაყენა. კილიან მბაპეს არაერთი შანსი ჰქონდა, თუმცა მასპინძელთა დაცვა მყარად იდგა. მადრიდელთა უკანა ხაზზე იმავეს თქმა რთულია, რაც გადამწყვეტი აღმოჩნდა ამ მატჩში და შესაძლოა, გადამწყვეტი გამოდგეს მთლიანად საჩემპიონო რბოლაშიც.

მატჩის უდიდეს ნაწილში მადრიდელები აგრესიულად უტევდნენ, თუმცა ამას შედეგი არ მოჰყოლია. მბაპე მარცხენა ფლანგიდან მუდმივ საფრთხეს ქმნიდა. იმის ფონზე, რომ ვინისიუს ჟუნიორი სათადარიგო სკამზე დარჩა, კილიანი პირველი ტაიმის მთავარი ფიგურა იყო. მან მეტოქის მეკარეს რამდენიმე რთული ბურთის მოგერიება აიძულა.

მალიორკამ შანსი ხელიდან არ გაუშვა და პირველივე რეალური მომენტი გოლად აქცია. ედუარდო კამავინგამ მეტოქე საჯარიმოში უყურადღებოდ დატოვა, ფლანგზე გათამაშებულ კომბინაციას კი იდეალური ჩაწოდება მოჰყვა. მანუ მორლანესს საკმარისი დრო ჰქონდა ბურთის დასამუშავებლად და შესასრულებლად, რის შედეგადაც მასპინძლები შესვენების წინ დაწინაურდნენ.

მადრიდელებმა ზეწოლა გააძლიერეს და მატჩის მიწურულს ანგარიში გაათანაბრეს. ტრენტ ალექსანდერ-არნოლდმა კუთხური ჩააწოდა, ედერ მილიტაომ კი თავური დარტყმით წონასწორობა აღადგინა. ამის შემდეგ ბლანკოსი მოსაგებად გაიქცა, თუმცა დაისაჯა - ვეტერანმა თავდამსხმელმა, ვედატ მურიკიმ, მსაჯის მიერ კომპენსირებულ დროში გამარჯვების გოლი გაიტანა.

ამ თამაშის შემდეგ მადრიდის რეალი ლიდერ ბარსელონას 4 ქულით ჩამორჩება, კატალონიელებს კი დღეს მოგვიანებით ატლეტიკოსთან მატჩი ელით. მალიორკას კი 31 ქულა დაუგროვდა და მე-17 ადგილზე გადაინაცვლა.