რივზი: ,,მამუკელაშვილს გამთამაშებლის დონის საკალათბურთო ინტელექტი აქვს"

ლოს ანჯელეს ლეიკერსი წინასასეზონო მატჩებში საკმაოდ საინტერესოდ გამოიყურება.

გუნდმა ამ დროისთვის 3 შეხვედრიდან 2 მოიგო და 1 წააგო. კალიფორნიული კლუბის თამაშში არაერთი დადებითი ასპექტი გამოიკვეთა, თუმცა განსაკუთრებულ ყურადღებას სანდრო მამუკელაშვილის გამოსვლა იმსახურებს.

სანდრო მამუკელაშვილი ლეიკერსის ერთ-ერთი ყველაზე მნიშვნელოვანი შენაძენი იყო ზაფხულის სატრანსფერო პერიოდში.

თავდაპირველად ქართველი კალათბურთელი რუი ჰაჩიმურას შემცვლელად განიხილებოდა, თუმცა მან უკვე დაამტკიცა, რომ შეტევაში გაცილებით მრავალფეროვანი შესაძლებლობები აქვს.

უოკერ კესლერის არყოფნაში ლეიკერსმა მამუკელაშვილის მაღალი მოთამაშის პოზიციაზე გამოყენებაც სცადა.

მიუხედავად იმისა, რომ ქართველმა ამ როლშიც კარგი შთაბეჭდილება დატოვა, გუნდის ვარსკვლავმა ოსტინ რივზმა მისი თამაშის ერთ განსაკუთრებულ თვისებაზე გაამახვილა ყურადღება, რომელიც მამუკელაშვილს სხვა კალათბურთელებისგან გამოარჩევს.

რივზმა ქართველ თანაგუნდელთან ერთად თამაშის გამოცდილებაზე ისაუბრა:

„დიახ, ის კარგი კალათბურთელია. ვფიქრობ, მოსამზადებელი შეკრების პირველ კვირაში გარკვეული სირთულეები ჰქონდა, რადგან ყოველ შეტევაში ცდილობდა, ყველაფერი სწორად გაეკეთებინა.

ვიცი, რომ ჯეი ჯეი რედიკი ესაუბრა, მეც ვესაუბრე და დარწმუნებული ვარ, ლუკაც დაელაპარაკა. ვუთხარით, რომ აქ შემთხვევით არ არის. ჩვენ მისი გვჯერა და გვინდა, რომ საკუთარი თამაში ითამაშოს.

ეს იყო მთავარი გზავნილი, რომლის გადაცემასაც ვცდილობდით.

მას იმდენად მაღალი საკალათბურთო ინტელექტი აქვს, რომ თუ მოხსნას მოიპოვებს, ფაქტობრივად, გამთამაშებლის ფუნქციები უნდა შეასრულოს.

მნიშვნელობა არ აქვს, მოედანზე მე ვიქნები თუ ლუკა. თუ სანდრო ბურთს მოიპოვებს, შეტევას წამოიწყებს და მისთვის ხელსაყრელი სიტუაცია შეიქმნება, ჩვენ ვენდობით ნებისმიერ გადაწყვეტილებას, რომელსაც მიიღებს“, - განაცხადა რივზმა.

ჯეი ჯეი რედიკმაც აღიარა, რომ მოსამზადებელი შეკრების საწყის ეტაპზე მამუკელაშვილი გარკვეულწილად გადატვირთული ჩანდა, რადგან ცდილობდა, მისთვის განსაზღვრულ როლს მორგებოდა.

თუმცა როგორც რედიკი, ისე რივზი შეთანხმდნენ, რომ ქართველი კალათბურთელისთვის საკუთარი, ბუნებრივი სტილით თამაშის საშუალების მიცემა გუნდისთვის გაცილებით სასარგებლო იქნებოდა.

როგორც ჩანს, ეს ლეიკერსის ერთ-ერთი საუკეთესო გადაწყვეტილება აღმოჩნდა.

მამუკელაშვილისთვის სწრაფ შეტევებში მეტი თავისუფლების მინიჭებით გუნდმა საშუალება მისცა ქართველს, სრულად გამოევლინა საკუთარი საკალათბურთო ინტელექტი და შეტევების ორგანიზების მრავალმხრივი უნარები.

თუ ამას მის ქულების დაგროვების შესაძლებლობებსაც დავუმატებთ, ნათელი ხდება, რატომ იქცა მამუკელაშვილი ასე სწრაფად ლეიკერსის შეტევითი სისტემის მნიშვნელოვან იარაღად.

ჯეი ჯეი რედიკი სანდრო მამუკელაშვილისთვის სპეციალურ კომბინაციებს ამუშავებს

მიუხედავად იმისა, რომ ცენტრის პოზიციისთვის მამუკელაშვილი სიმაღლით ოდნავ ჩამორჩება ტიპურ წარმომადგენლებს, სათადარიგო მაღალის როლში საკმაოდ ეფექტიანია.

პერიმეტრიდან სროლა, ფარქვეშ საკუთარი შესაძლებლობებით სასროლი პოზიციის შექმნა და შეტევების ორგანიზება ქართველ კალათბურთელს მრავალფეროვან შემტევ მოთამაშედ აქცევს.

თუმცა, როგორც ჩანს, ჯეი ჯეი რედიკი კიდევ უფრო შორს წასვლას აპირებს.

ლეიკერსის ერთ-ერთ ბოლო ვარჯიშზე მთავარმა მწვრთნელმა გაამხილა, რომ სამწვრთნელო შტაბთან ერთად სპეციალურად მამუკელაშვილისთვის განკუთვნილ კომბინაციებზე მუშაობს, რათა მისი შესაძლებლობები მაქსიმალურად გამოიყენოს.

მამუსთვის სპეციალური კომბინაციების პაკეტი გვექნება. ტაიმაუტების შემდეგ რამდენიმე ასეთი კომბინაცია უკვე გამოვიყენეთ.

ერთ-ერთი მათგანი გოლდენ სტეიტთან შეხვედრის პირველივე შეტევაში უნდა შეგვესრულებინა, თუმცა სწორად ვერ განვახორციელეთ. არაუშავს.

მასთან დაკავშირებით კრეატიულ მიდგომებს გამოვიყენებთ. ეს ძალიან საინტერესო იქნება“, - განაცხადა რედიკმა.

ჯეი ჯეი რედიკმა უკვე დაამტკიცა, რომ ტაქტიკურად კომპეტენტური მთავარი მწვრთნელია.

ამასთან, მის სამწვრთნელო შტაბში ისეთი გამოცდილი სპეციალისტები მუშაობენ, როგორებიც ნეიტ მაკმილანი და სკოტ ბრუკსი არიან.

შესაბამისად, ლეიკერსს ტაქტიკური ცოდნისა და გამოცდილების ნაკლებობა ნამდვილად არ აწუხებს.

ამ პირობებში ისეთი კალათბურთელის ყოლა, როგორიც სანდრო მამუკელაშვილია, გუნდისთვის მნიშვნელოვანი უპირატესობაა.

ქართველს აქვს საკმარისი საკალათბურთო ინტელექტი კომბინაციების გასააზრებლად და შესაბამისი ტექნიკური შესაძლებლობები მათ შესასრულებლად.

ბუნებრივია, გაზრდილმა პასუხისმგებლობამ მამუკელაშვილის თამაშზეც დადებითად იმოქმედა.

სანდრო მამუკელაშვილის საშუალო სტატისტიკა წინასასეზონო სამ მატჩში: 14.0 ქულა, 2.0 მოხსნა, 3.7 პასი, 1.0 ჩაჭრა, 0.7 დაფარება, 57.1% სროლების სიზუსტე.

მიუხედავად იმისა, რომ მოხსნების მხრივ მისი სტატისტიკა გაუმჯობესებას საჭიროებს, ლეიკერსი მამუკელაშვილის შედეგიანობით კმაყოფილი უნდა იყოს.

მართალია, 3 მატჩი საბოლოო დასკვნების გამოსატანად საკმარისი არ არის, თუმცა 27 წლის ქართველი უკვე აჩვენებს, რატომ იმსახურებს გუნდის როტაციაში უფრო მნიშვნელოვან როლს.

მიუხედავად იმისა, რომ ნაკლებად სავარაუდოა, მამუკელაშვილი ლეიკერსის სასტარტო ხუთეულის მუდმივი წევრი გახდეს, მას ყველა წინაპირობა აქვს, სათადარიგოთა სკამიდან გუნდის ერთ-ერთ უმნიშვნელოვანეს მოთამაშედ ჩამოყალიბდეს და კალიფორნიულ კლუბს შემადგენლობის სიღრმე და დამატებითი შესაძლებლობები შესძინოს.

VIDEO: დონჩიჩისა და მამუკელაშვილის გამორჩეული თამაში - ლეიკერსმა საკრამენტო დაამარცხა