ესპანეთის ეროვნულმა ნაკრებმა დალასში გამართულ მსოფლიო ჩემპიონატის ნახევარფინალში საფრანგეთი უშანსოდ, 2:0 დაამარცხა და 2026 წლის მუნდიალის ფინალში ტრიუმფით გავიდა.
დე ლა ფუენტეს გუნდმა პირველივე წუთებიდანვე დაამყარა კონტროლი თამაშზე და მეტოქეს შანსი არ დაუტოვა.
ანგარიში პირველ ტაიმში მიკელ ოიარსაბალმა პენალტით გახსნა, რომელიც ლამინ იამალმა ლუკას დინის წინააღმდეგ აქტიურობით მოიპოვა. მეორე ნახევარში კი პედრო პორომ დანი ოლმოსთან გათამაშებული კომბინაცია ეფექტური გოლით დააგვირგვინა და საბოლოო წერტილი დასვა.
ესპანურ მედიაში ფეხბურთელებმა უმაღლესი შეფასებები დაიმსახურეს. მოედნის ცენტრში თამაშს სრულად აკონტროლებდა როდრი (შეფასება: 9/10), რომელმაც მორიგი დიდებული მატჩი ჩაატარა. დაცვაში ფანტასტიკური იყო 19 წლის კუბარსი (9/10), რომელმაც ფრანგების შეტევები სრულად გააუვნებლა, დანი ოლმომ (9/10) კი საგოლე პასითა და კრეატიული თამაშით გააკეთა სხვაობა.
მთავარმა მწვრთნელმა, ლუის დე ლა ფუენტემ (9/10), კიდევ ერთხელ დაამტკიცა, რომ მისი ტაქტიკა უზადოდ მუშაობს. ესპანეთი ახლა ფინალშია და მეტოქეს ელოდება, რომელიც ინგლისისა და არგენტინის წყვილში გამოვლინდება.
