საქართველოს ეროვნული ნაკრების მთავარმა მწვრთნელმა, რამაზ სვანაძემ უნგრეთთან მატჩის წინ გამართულ პრესკონფერენციაზე გუნდში არსებულ დისციპლინასა და ფეხბურთელების პროფესიონალიზმზე ისაუბრა.
მწვრთნელის თქმით, ნაკრების წევრებმა თავიანთი დამოკიდებულება ქვეყნისა და საქმის მიმართ არაერთხელ დაამტკიცეს, ამიტომ ამ კუთხით გუნდში რაიმე სახის პრობლემა არ არსებობს:
რაც შეეხება დისციპლინას, მე მაქვს შეხება ეროვნული ნაკრების ფეხბურთელებთან. ფეხბურთელებთან, რომლებსაც უკვე თავისი პროფესიონალიზმი, ხასიათი და დამოკიდებულება თავისი ქვეყნის მიმართ დიდი ხანია დამტკიცებული აქვთ. ამ მხრივ არანაირი პრობლემა არ არის და არც იქნება, დარწმუნებული ვარ.
სვანაძემ ასევე აღნიშნა, რომ ერთობლივი მუშაობისას სირთულეები არასდროს ყოფილა და თითოეულმა მოთამაშემ იცის, რომ მაქსიმალური შედეგისთვის მკაცრი რეჟიმი და დისციპლინაა საჭირო:
როგორც გიორგიმ თავიდანვე აღნიშნა, ჩვენ ერთმანეთს საკმაოდ დიდი ხანია ვიცნობთ და არასდროს არ ყოფილა პრობლემა არცერთი ნაკრების შეკრებაზე, ეს იქნებოდა ახალგაზრდული თუ განსაკუთრებით ეროვნული. თითოეული ფეხბურთელი მოტივირებულია, რომ მაქსიმუმი გაიღოს და იციან, რომ მაქსიმუმის გაღებას პირველ რიგში სჭირდება დისციპლინა და რეჟიმი.
