როგორი სტატისტიკა აქვს პოჩეტინოს პრემიერ ლიგის გუნდებში?

უკეთ გავიცნოთ მანჩესტერ იუნაიტედის ახალი მთავარი მწვრთნელი.

როგორც გითხარით, უახლოეს პერიოდში წითელი ეშმაკები მთავარ მწვრთნელად 54 წლის არგენტინელს, მაურისიო პოჩეტინოს დანიშნავენ.

პრემიერ ლიგაში პოჩეტინოს საუთჰემპტონში, ტოტენჰემსა და ჩელსიში აქვს ნამუშევარი. 

საუთჰემპტონს არგენტინელმა 2013 წლის იანვრიდან 2014 წლის მაისამდე უხელმძღვანელა და 60 მატჩში 23 გამარჯვება მოიპოვა, 18 ფრე ითამაშა და 19-ჯერ დამარცხდა. გამარჯვებების პროცენტი კი 38.33-ზე ჰქონდა.

ტოტენჰემი ის კლუბია, სადაც პოჩეტინომ სახელი ყველაზე მეტად გაითქვა და ყველაზე დიდხანსაც გაჩერდა - ყველაზე დიდ მიღწევად კი 2019 წლის ჩემპიონთა ლიგის ფინალში გასვლა რჩება, სადაც მისი გუნდი ლივერპულთან 0:2 დამარცხდა.

დეზების სათავეში პოჩეტინომ 293 მატჩი გამართა, 160 გამარჯვება მოიპოვა, 60 ფრე ითამაშა და 73-ჯერ დამარცხდა. აქ გამარჯვებების პროცენტი გაცილებით უკეთესია - 54.61.

ჩელსიში კი პოჩეტინომ ზუსტად ერთი სეზონი იმუშავა (2023/24) და 51 მატჩში 26 გამარჯვების მოპოვება შეძლო, 11 ფრე ითამაშა და 14-ჯერ დამარცხდა (50.98%).

ერთადერთი ტიტულები მწვრთნელის რანგში პოჩეტინოს პარი სენ-ჟერმენში აქვს მოპოვებული (საფრანგეთის ჩემპიონი 2021/22, საფრანგეთის თასის მფლობელი 2020/21 და საფრანგეთის ჩემპიონთა თასის მფლობელი 2020).