რომაში ომია: რანიერი კლუბის დატოვებას აპირებს

კლაუდიო რანიერი რომადან წასვლასთან ახლოსაა: ცივი ომი გასპერინისთან გრძელდება

სერია A-ს ბინადარი რომა ბოლო ერთ კვირაში ნამდვილ საბრძოლო მოქმედებების ეპიცენტრად იქცა. ამის მიზეზი ჯან პიერო გასპერინისა და კლაუდიო რანიერის საჯარო კონფლიქტია. როგორც ჩანს, კლუბის მრჩეველი რომაულ გუნდს მალე დატოვებს.

კონფლიქტი, რომელიც გასპერინის ცრემლებად დაუჯდა

გუშინდელ პრესკონფერენციაზე გასპერინიმ ემოციები ვერ შეიკავა. მან ხაზი გაუსვა იმ განსხვავებას, თუ როგორ ეპყრობოდნენ მას ატალანტაში და რა ხდება ახლა რომაში.

Corriere dello Sport იტყობინება, რომ ამ დაძაბულობის გამო მთავარი დარტყმა კლაუდიო რანიერიზე მოდის. ვარაუდობენ, რომ მისი წასვლის საკითხი უკვე გადაწყვეტილია. რანიერი გუშინ ტრიგორიაში არ გამოჩენილა, რაც მის ახლო მომავალში წასვლის კიდევ ერთ ნიშნად აღიქმება.

გაუგებრობა და მოსალოდნელი გადადგომა

როგორც წესი, რანიერი რომაული კლუბის მატჩებს რიკი მასარასთან ერთად ესწრება ხოლმე, თუმცა მისი გამოჩენა სერია A-ს დღევანდელ შეხვედრაზე კითხვის ნიშნის ქვეშ დგას. იტალიელი სპეციალისტი არ ელოდა, რომ მის კომენტარებს ასეთი ქაოსი მოჰყვებოდა - მას ეგონა, რომ საკუთარი სიტყვებით გუნდს დაეხმარებოდა.

რანიერის მცდელობამ საპირისპირო შედეგი გამოიღო. უახლოეს დღეებში ტრიგორიას კლუბის მფლობელები, ფრიდკინები ეწვევიან. სწორედ ეს ვიზიტი შეიძლება გახდეს ყოფილი მწვრთნელის პოსტიდან წასვლის ოფიციალური მიზეზი.