საბა ფურცელაძემ ურთულესი ნახევარფინალი მოიგო და თბილისის ჩელენჯერის ფინალში გავიდა

კაჭრეთში მიმდინარე თბილისის ჩელენჯერის ნახევარფინალში ქართველმა საბა ფურცელაძემ ამერიკელი მარტინ დამ უმცროსი დაამარცხა.

ბრძოლა ძალიან დაძაბული გამოვიდა და სამ სეტს გაგრძელდა - საბოლოოდ, საბამ გამარჯვება 7:5 6:7 (4) 7:6 (7) მოახერხა და ფინალში გავიდა.

აღნიშნულ შეხვედრაში ფურცელაძემ 24 ეისი მოაწოდა და 7 ორმაგი შეცდომა დაუშვა, მისმა მეტოქემ კი 21-ხელ მოაწოდა აუღებლად და 5 ორმაგით აჩუქა ქულა მეტოქეს.

ფინალურ დაპირისპირებაში ფურცელაძე, რომელიც ამ ტურნირზე მე-4 ნომრად არის განთესილი, იტალიელ ფედერიკო სინას დაუპირისპირდება, რომელიც თბილისის ჩელენჯერზე მერვე ნომრად განთესეს. 

მატჩი ხვალ, 24 მაისს გაიმართება.