სამი დუელი, რომელიც ელ კლასიკოს შედეგს განსაზღვრავს

ესპანური ფეხბურთის მთავარი დაპირისპირება ბრუნდება - ბარსელონა საკუთარ მოედანზე რეალ მადრიდს უმასპინძლებს.

ჰანსი ფლიკის გუნდს მხოლოდ ერთი ქულა აშორებს ტიტულის ოფიციალურად გაფორმებამდე. ფრეც კი საკმარისი იქნება, რომ ბარსელონამ მათემატიკურად გაინაღდოს ჩემპიონობა, თუმცა გუნდს სეზონის 100 ქულით დასრულების ამბიციაც აქვს. თავის მხრივ, რეალს შეცდომის უფლება აღარ აქვს და ყველანაირად შეეცდება მეტოქეს საჩემპიონო ზეიმი ჩაუშალოს.

სამი მთავარი დუელი, რომელმაც შესაძლოა მატჩის ბედი გადაწყვიტოს:

კუნდე ვინისიუს ჟუნიორის წინააღმდეგ

ფრანგი დისკვალიფიკაციის შემდეგ ძირითად შემადგენლობას უბრუნდება. მისი სისწრაფე და ფიზიკური მონაცემები კრიტიკულად მნიშვნელოვანი იქნება ვინისიუსის შესაჩერებლად, რომელიც ბოლო დროს კარგ ფორმაშია - ბრაზილიელმა ბოლო სამ მატჩში 4 გოლი გაიტანა. ბარსელონას მთავარი ამოცანა იქნება, ვინისიუსს სივრცეები არ დაუტოვოს, რადგან მას კონტრშეტევებზე თამაშის ბედის ერთპიროვნულად გადაწყვეტა შეუძლია.

ფერმინ ლოპესი ორელიენ ჩუამენის წინააღმდეგ

ფერმინი ფლიკის ბარსელონას ერთ-ერთი მთავარი აღმოჩენაა. მისი აგრესიული პრესინგი და ენერგია დიდ პრობლემებს შეუქმნის ჩუამენის, რომელიც ბოლო დროს კლუბში არსებული დაძაბულობის გამო ფსიქოლოგიური წნეხის ქვეშ იმყოფება. ფერმინის უნარი, აიძულოს მეტოქე შეცდომა დაუშვას და სწრაფად შეუტიოს თავისუფალ ზონებს, შესაძლოა მადრიდელებისთვის დამანგრეველი აღმოჩნდეს.

პედრი ჯუდ ბელინგემის წინააღმდეგ

მიუხედავად იმისა, რომ ისინი მოედანზე ერთმანეთს პირისპირ ხშირად არ შეხვდებიან, ორივე თავისი გუნდის კრეატიული ლიდერია. პედრი აკონტროლებს თამაშის ტემპს და სიმშვიდეს მატებს ბარსელონას ნახევარდაცვას. ბელინგემს კი, გასული სეზონისგან განსხვავებით, ტრავმების გამო არასტაბილური წელი აქვს, თუმცა ინგლისელი მაინც რჩება იმ მოთამაშედ, რომელსაც კრიტიკულ მომენტში სასწაულის მოხდენა შეუძლია. ვინც ცენტრში დომინაციას შეძლებს, მატჩის შედეგსაც ის განსაზღვრავს.