სენეგალის ნაკრების 27 წლის ნახევარმცველმა, პაპ გუიემ, ეროვნულ გუნდში თამაში დროებით შეაჩერა და ამის მიზეზად სამწვრთნელო შტაბი დაასახელა.
აფრიკული გუნდი მსოფლიო ჩემპიონატის 1/16-ფინალში ბელგიასთან დამატებით დროში დამარცხდა (2:3). პაპ გუიე სასტარტო შემადგენლობაში იყო და 66-ე წუთზე შეცვალეს - იმ მომენტში, როდესაც სენეგალელები მატჩს 2:0-ს იგებდნენ.
„მე კიდევ დაგიბრუნდებით, რომ ტურნირიდან გამოვარდნაზე რამდენიმე სიტყვა გითხრათ... მაგრამ ახლა ვაცხადებ, რომ ნაკრებში გამოსვლას ვაპაუზებ - მანამ, სანამ ეს სამწვრთნელო შტაბი აგრძელებს მუშაობას“, - დაწერა ვილიარეალის ფეხბურთელმა სოციალურ ქსელში.
ცნობისთვის, სენეგალის ნაკრების მთავარი მწვრთნელი პაპ ტიავია. რაც შეეხება გუიეს, მან მიმდინარე მუნდიალზე ჩატარებულ 4 მატჩში 2 გოლი და 1 საგოლე გადაცემა მიითვალა (ყველა შედეგიანი მოქმედება ერაყთან 5:0 მოგებულ შეხვედრაში ჰქონდა).
