"საოცარი შეგრძნებაა, როცა შენი ქვეყნის მაისურით პირველად თამაშობ" - მამაგეიშვილი დებიუტზე

საქართველოს ნაკრების დებიუტანტმა, გიზი მამაგეიშვილმა, ისრაელთან (2:2) შეხვედრის შემდეგ, ჟურნალისტებთან კომენტარი გააკეთა.

"უფრო გამიხარდებოდა, თუკი ჩემი სადებიუტო მატჩი გამარჯვებით დასრულდებოდა. საოცარი შეგრძნებაა, როცა შენი ქვეყნის მაისურით პირველად თამაშობ, თანაც ძირითად შემადგენლობაში ვიყავი. ვამაყობ და ბედნიერი ვარ, რომ ეს ნდობა დავიმსახურე.

ჩემთვის უცხო პოზიციაზე მომიწია თამაში. შევეცდები განვვითარდე, დავიხვეწო და ნაკრებმა ჩემგან შესაძლებლობების მაქსიმუმი მიიღოს", - აღნიშნა შტურმ გრაცის ნახევარმცველმა.

ვილი სანიოლმა პრესკონფერენციისას მამაგეიშვილზე თქვა, რომ საინტერესო თვისებების მქონე ფეხბურთელია, ორთაბრძოლებში კარგია და მარჯვენა ფლანგზე სათამაშოდ ყველაფერი აქვს. ასევე დაამატა, რომ მისი ამ პოზიციაზე ხილვა მომავალშიც შესაძლებელია.

მამაგეიშვილის გარდა, ეროვნულ გუნდში სადებიუტო მატჩი ჩაატარეს უნგრული მტკ ბუდაპეშტის მცველმა, ილია ბერიაშვილმა და ისრაელური ბეიტარ იერუსალიმის უკანახაზელმა, ლუკა გადრანმა.

საქართველოს ნაკრები მომდევნო თამაშს 29 მარტს, კაუნასში, ლიეტუვის ნაკრების წინააღმდეგ გამართავს.

"ცოტა მოვდუნდით, არგამართლების ფაქტორიც იყო" - კვარაცხელია ისრაელთან მატჩზე