საქართველოს ნაკრების მთავარმა მწვრთნელმა, ვილი სანიოლმა, ისრაელთან შეხვედრის შემდეგ (2:2), პრესკონფერენცია გამართა.
"პირველ 60 წუთში ბევრი კარგი რამ იყო, გვქონდა ინტენსივობა, მონდომება და 2 გოლი გავიტანეთ. ეს ამხანაგური მატჩი იყო, შედეგზე არ უნდა ვიყოთ ფოკუსირებული და დავინახოთ ის ასპექტები, რომლებიც ამ შეხვედრამ აჩვენა.
არაერთი ახალი ფეხბურთელი გვყავდა - ბერიაშვილმა, გადრანმა და მამაგეიშვილმა ნაკრებში პირველად ითამაშეს. იყვნენ ისეთებიც, ვისაც ამ ეტაპზე სათამაშო პრაქტიკის ნაკლებობა აქვს. მთავარი ერთა ლიგისთვის მომზადებაა და ამისთვის 6 თვეა.
2:0-ზე ფეხბურთელებს მეტი დაკვირვებით თამაში მართებდათ, სიჩქარე და პირველი პასების სწრაფად კეთება საჭირო არ იყო. სათამაშო გეგმის შენარჩუნება იყო მნიშვნელოვანი და გაკვირვებული ვარ, რატომ ჩქარობდნენ, მეტად ორგანიზებულად უნდა გვეთამაშა.
შედეგი სასიამოვნო არაა, მაგრამ დადებით დეტალებზე ყურადღების გამახვილება შეგვიძლია. ისრაელი სუსტი გუნდი არაა და ეს წარსულში არაერთხელ უჩვენებია.
კიტეიშვილს კუნთის გარკვეული პრობლემა ჰქონდა და მოედნიდან სწორედ ამიტომ გამოვიყვანე. მისი და მექვაბიშვილის ტრავმებმა გეგმები შეგვიცვალა და ცვლილებების გაკეთების სივრცეები შეგვიზღუდა. წინ მეორე თამაშია და მოედანზე გასვლის საშუალება ყველა ფეხბურთელს მიეცემა", - აღნიშნა სანიოლმა.
საქართველოს ნაკრებმა ისრაელთან ისტორიაში მეშვიდე ურთიერთშეხვედრა გამართა - 1 მოგება, 3 ფრე, 3 წაგება.
ხვიჩა კვარაცხელიამ, კაპიტნის რანგში, ეროვნულ გუნდში პირველი დუბლი შეასრულა (სულ მე-3 დუბლია - შვედეთთან და შოტლანდიასთან), ჯამში 22 გოლი მოაგროვა, გიორგი მიქაუტაძეს გადაასწრო და ყველა დროის ბომბარდირ შოთა არველაძეს 4 გოლითღა ჩამორჩება.
საქართველოს ნაკრები მომდევნო თამაშს 29 მარტს, კაუნასში, ლიეტუვის ნაკრების წინააღმდეგ გამართავს.
