სინამდვილეში რამ გამოიწვია რეალის ჩავარდნა?

მიუხედავად იმისა, რომ სეზონის დასრულებამდე ხუთი მატჩია დარჩენილი, მადრიდის რეალისთვის ის უკვე ფაქტობრივად უკვე დასრულებულია.

მთელი სეზონის განმავლობაში კლუბს მრავალი პრობლემა ჰქონდა, მათ შორის გასახდელში მწვრთნელებთან დაპირისპირება, ფეხბურთელების მხრიდან ერთგულების ნაკლებობა და დისციპლინური დარღვევები, თუმცა რეალისთვის ყველაზე დიდი დაბრკოლება წელს ტრავმები აღმოჩნდა.

Defensa Central-ის ინფორმაციით, მიმდინარე სეზონში მადრიდელებს ჯამში 51 ტრავმა დაუგროვდათ. ეს ერთით მეტია იმ მაჩვენებელზე, რომელიც კარლო ანჩელოტის ბოლო სეზონში დაფიქსირდა და მაშინ საგანგაშოდ მიიჩნეოდა. სიას ბოლოს კილიან მბაპე დაემატა, რომელმაც მარცხენა ფეხზე კუნთის დაზიანება მიიღო. ასევე, გუნდის წამყვანმა მცველმა ედერ მილიტაომ მყესის სერიოზული ტრავმა მიიღო, რის გამოც ოპერაცია დასჭირდება. ის მინიმუმ ხუთ თვეს გამოტოვებს, რაც მის მსოფლიო ჩემპიონატზე გამგზავრების იმედებს წერტილს უსვამს.

მოსალოდნელია, რომ მბაპე 3 მაისს ესპანიოლთან შეხვედრას გამოტოვებს და მისი მონაწილეობა ელ კლასიკოშიც საეჭვოა. კლუბმა პრობლემის მოგვარება იანვარში სამედიცინო დეპარტამენტში ნიკო მიჰიჩის დაბრუნებითა და ფიზიკური მომზადების მწვრთნელად ანტონიო პინტუსის დანიშვნით სცადა, თუმცა ამან სიტუაცია ვერ შეცვალა. მთელ შემადგენლობაში მხოლოდ ოთხმა ფეხბურთელმა მოახერხა ტრავმებისგან თავის დაღწევა: ვინისიუსმა, გონსალომ, ფრან გარსიამ და ბრაჰიმმა. ყველა სხვა მოთამაშე სეზონის განმავლობაში მინიმუმ ერთხელ მაინც იყო დაშავებული.

ეს რეალისთვის ძალიან ცუდი ნიშანია, რადგან ტრავმების უმრავლესობამ პირდაპირი გავლენა იქონია გუნდზე - მათ შორის ტიბო კურტუას არყოფნამ ბაიერნთან ჩემპიონთა ლიგის უმნიშვნელოვანეს მატჩში. ამიტომ, მომავალი სეზონისთვის ტრავმების ამ პრობლემის მოგვარება კლუბის უპირველესი პრიორიტეტი უნდა იყოს.