უეფას კონფერენს ლიგის ძირითადი ეტაპის უმნიშვნელოვანესი მატჩის წინ, სადაც საქართველოს ჩემპიონი იბერია 1999 შვედურ მიალბის უმასპინძლებს, ციფრები და სტატისტიკა თბილისელთა სასარგებლოდ მეტყველებს.
საკუთარ მოედანზე იბერია 1999 ტრადიციულად ძლიერად და დამაჯერებლად ასპარეზობს. ბოლო 16 საშინაო შეხვედრიდან გუნდმა 8 მოგება მოიპოვა, 4 ფრედ დაასრულა და მხოლოდ 4-ჯერ დათმო შეხვედრა.
ეს შედეგი ნათლად აჩვენებს, თუ რამდენად დიდ უპირატესობას ანიჭებს თბილისელებს საკუთარი გულშემატკივრის წინაშე თამაში.
ამის საპირისპიროდ, შვედური მიალბი საგარეო მატჩებში სერიოზულ პრობლემებს აწყდება. კლუბს ბოლო 16 გასვლითი შეხვედრიდან მხოლოდ 2 მოგება, 7 ფრე და 7 მარცხი აქვს.
შვედების სტუმრად თამაშის დინამიკა და შიდა ჩემპიონატში არსებული კრიზისი იბერიას დამატებით შანსებს აძლევს.
დღეს, 20:45-ზე იბერია 1999 საკუთარ კედლებში ითამაშებს, ხოლო შვედურ კლუბს თბილისში, უცხო გარემოსა და ადგილობრივი ფანების წნეხის ქვეშ მოუწევს ასპარეზობა, რაც ქართულ გუნდს 3 ქულის მოპოვების რეალურ პერსპექტივას უქმნის.
მოდი სტადიონზე და დაეხმარე იბერიას ისტორიული ქულების მოპოვებაში! ბილეთების შეძენა შესაძლებელია ამ ბმულზე.
