ცხრილში მაგრად დაიძაბა - რამდენ ქულაშია დინამო თბილისი ლიდერთან?

დინამო თბილისმა ეროვნული ლიგის 32-ე ტურში დილა გორი 2:0 დაამარცხა და საჩემპიონო რბოლაში პოზიციები გაიმყარა.

29-ე წუთზე ანგარიში გახსნა ალგასიმ ბამ, რომელმაც დინამოელთა მაისურით სადებიუტო გოლი შეაგდო. მიმდინარე ჩემპიონატში მე-9 გოლი გაიტანა მათე ვაწაძემ - 52-ე წუთზე საბოლოო ანგარიში დააფიქსირა.

ვეტერანი ფორვარდი ბომბარდირთა სიაში მხოლოდ ტორპედოელ კომნენ ანდრიჩსა (13 გოლი) და რუსთაველ ჟან ალმეიდას (10 გოლი) ჩამორჩება.

დინამო ბათუმის ერთ-ერთ აუტსაიდერ სპაერთან მოულოდნელი მარცხის ფონზე, თემურ ქეცბაიას გუნდმა ლიდერთან სხვაობა 1 ქულამდე შეამცირა, დარჩენილ 4 ტურში კი ტორპედოსა და სამგურალს უმასპინძლებს, ხოლო გაგრასთან და მეშახტესთან სტუმრად ითამაშებს.

აღსანიშნავია, რომ ცხრილში დინამო თბილისის გადასწრების შანსი აქვს იბერია 1999-ს, რომელიც დღეს გაგრას ხვდება და თუ მოიგებს, დინამო ბათუმთან ერთად ჩემპიონატის თანალიდერი გახდება.

დინამო თბილისი მომდევნო ტურის შეხვედრას ჩაატარებს 20 ნოემბერს და დინამო არენაზე ტორპედო ქუთაისს მიიღებს. 

რაც შეეხება ზედიზედ 6 მატჩის წამგებ დილას, შიდა ქართლელები 20 ნოემბერს გაგრას ესტუმრებიან.