ბარსელონას ვარსკვლავმა რაფინიამ ლამინ იამალთან თავის ურთიერთობაზე ისაუბრა და აღიარა, რომ საჭიროების შემთხვევაში, ახალგაზრდა ტალანტისთვის ჭკუის სწავლება არ ერიდება.
ბრაზილიელმა შემტევმა, რომელიც კლუბის ერთ-ერთი ლიდერი გახდა, 18 წლის ფეხბურთელს თავისი უმცროსი ძმა უწოდა.
„ის ჩემზე 11 წლით უმცროსია, ჩემს ღვიძლ ძმაზე პატარაა. ამიტომაც ვუყურებ მას, როგორც უმცროს ძმას და ვცდილობ, მაქსიმალურად დავეხმარო“, - განაცხადა რაფინიამ TNT Sports-თან ინტერვიუში.
მისი თქმით, მათი ცნობილი ერთობლივი საგოლე აღნიშვნა ინტერნეტში ნახეს და უბრალოდ ძმობის სიმბოლოდ აქციეს.
მიუხედავად იამალის ფენომენალური ნიჭისა, რაფინია აღნიშნავს, რომ დისციპლინა ყველას სჭირდება.
მის ნიჭს მე ვერაფერს ვასწავლი, ეს ბუნებრივია, მაგრამ ჩემს ცხოვრებისეულ გამოცდილებას ვუზიარებ. ის კარგი ბიჭია, ყოველთვის მისმენს და რჩევას ითხოვს. თუმცა, თუ რამე სისულელეს ჩაიდენს, უფროსი ფეხბურთელები ეგრევე ვეჩხუბებით ხოლმე და ისიც გვიჯერებს
რაფინიამ ისიც გაამჟღავნა, რომ იამალი და ნეიმარი მსოფლიო ჩემპიონატის ფინალში ბრაზილია-ესპანეთის მატჩზე უკვე შეთანხმდნენ. თავად რაფინიასთვისაც ეს ოცნების ფინალია, სადაც მზად არის იამალის წინააღმდეგ ითამაშოს, რადგან თვლის, რომ ბრაზილიას მსოფლიო თასის მეექვსედ მოსაგებად უძლიერესი შემადგენლობა და დიდი პასუხისმგებლობა აქვს.
