ბარსელონასა და ესპანეთის ნაკრების ვარსკვლავმა, გავიმ, პოპულარულ საფეხბურთო თამაშში, "ეს თუ ის"-ში მიიღო მონაწილეობა, სადაც მას მსოფლიო ფეხბურთის საუკეთესო გარემარბებს შორის უნდა გაეკეთებინა არჩევანი.
კატალონიელი ნახევარმცველის პასუხები თითქმის ყოველ ჯერზე ერთსა და იმავე სახელს უკავშირდებოდა: ხვიჩა კვარაცხელია.
პსჟ-ის ქართველმა შემტევმა გავის რეიტინგში ისეთი ვარსკვლავები ჩამოიტოვა, როგორებიც არიან ადემოლა ლუკმანი, ალეხანდრო გარნაჩო, ლუის დიასი, ჯამალ მუსიალა, ენტონი გორდონი და ბუკაიო საკა.
გავიმ ხვიჩა კვარაცხელია საკუთარ უახლოეს მეგობარზე, ნიკო უილიამსზე მაღლაც კი დააყენა, რაც შემდეგნაირად ახსნა:
ნიკო ჩემი ძალიან ახლო მეგობარია, მაგრამ კვარაცხელია ჩემი ერთ-ერთი ყველაზე საყვარელი ფეხბურთელია.
კატალონიელმა ქართველი ვარსკვლავი მადრიდის რეალის ლიდერს, ვინისიუს ჟუნიორსაც კი ამჯობინა:
მიუხედავად იმისა, რომ ვინისიუსი წარმოუდგენლად ძლიერია, მე მაინც კვარაცხელიას ვირჩევ, რადგან ის ჩემი ფავორიტია.
კვარაცხელიას დაუმარცხებელი სერია გავის არჩევანში მხოლოდ უსმან დემბელესთან შეხვედრისას დასრულდა. როდესაც ნახევარმცველს ფინალურ ეტაპზე დემბელესა და ბარსელონას ამომავალ ვარსკვლავს, ლამინ იამალს შორის მოუწია საუკეთესოს დასახელება, გავიმ არჩევანის გაკეთებაზე უარი თქვა: „აქ არჩევა შეუძლებელია. ორივე.“
