"უაითის სურვილი უკვე ბევრს ნიშნავს" - მერაბი UFC-ის ივენთის საქართველოში ჩატარებაზე

მერაბ დვალიშვილმა Adjarabet Arena-სთან ექსკლუზიურ ინტერვიუში საქართველოში UFC-ის ღონისძიების შესაძლო ჩატარებაზე ისაუბრა.

"ძალიან კარგი იქნება, რომ საქართველოში UFC-ის ღონისძიება ჩატარდეს. მით უმეტეს, თუკი მეც მომეცემა საშუალება, ქართველი მაყურებლების წინაშე ვიბრძოლო, ეს სასწაული და ჩემი ოცნების ასრულება იქნება.

მანამდე ბევრი პროცედურაა და ეს, პირველ რიგში, ტექნიკურ საკითხებს ეხება. როგორც ვიცი, 10 ათას მაყურებელზე დიდი ტევადობის არენა არ გვაქვს და ეს საკითხი აუცილებლად მოსაგვარებელია.

ამას ემატება ისიც, რომ მე ჩემპიონი ვარ და, როგორც წესი, საჩემპიონო ბრძოლებს დიდ ქვეყნებში ატარებენ. თუმცა, რადგან დანა უაითმა თვითონ თქვა, რომ ამის სურვილი აქვს, ეს თავისთავად ბევრ რამეს ნიშნავს. სხვა მხრივ, ჩემზე რაც იქნება დამოკიდებული, ყველაფერს გავაკეთებ.

ეს უდიდესი შანსი იქნება ყველა იმ ქართველი მებრძოლისთვის, რომელიც ცდილობს, UFC-სთან კონტრაქტი გააფორმოს. როცა კონკრეტულ ქვეყანაში ღონისძიება ტარდება, იმ ქვეყნიდან ორგანიზაციაში ახალ მებრძოლებს იღებენ“, - თქვა დვალიშვილმა Adjarabet Arena-სთან ინტერვიუში.