2016 წლიდან მოყოლებული, ჯანი ინფანტინოს ფიფას საპრეზიდენტო არჩევნებზე პრობლემა არ შექმნია (2019 და 2023 წლებში ის კონკურენტის გარეშე აირჩიეს), თუმცა 2027 წელს ვითარება იცვლება. მსოფლიო ფეხბურთის მმართველი ორგანოს ხელმძღვანელის პოსტზე სამი კანდიდატია დარეგისტრირებული.
მოქმედი პრეზიდენტის გარდა, არჩევნებში მონაწილეობის სურვილი საფრანგეთის ფეხბურთის ფედერაციის პრეზიდენტმა, ფილიპ დიალომ და იაპონიის ფეხბურთის ასოციაციის საპატიო პრეზიდენტმა, კოზო ტაშიმამ გამოთქვეს. განსაკუთრებით საყურადღებოა ფრანგი კანდიდატის ფაქტორი, რომელსაც ზურგს უეფა უმაგრებს. საარჩევნო კომიტეტი კანდიდატურებს დეტალურად შეისწავლის და საბოლოო სიას 2027 წლის 18 თებერვალს დაამტკიცებს.
თავად არჩევნები 18 მარტს, მაროკოში, ფიფას 77-ე კონგრესზე გაიმართება. ხმის მიცემის უფლება 211 წევრ ფედერაციას აქვს (თითოს 1 ხმა). ვინაიდან კანდიდატი სამია, პირველ ტურში გამარჯვებულის გამოსავლენად ხმების 2/3 იქნება საჭირო. თუ ეს ვერ მოხერხდა, ბოლო ადგილზე გასული კანდიდატი გამოეთიშება, მეორე ტურში კი პრეზიდენტად ის აირჩევა, ვინც უბრალო უმრავლესობას (50%+1) მოაგროვებს. ხმის მიცემის პროცესი ფარული იქნება.