უნაი ემერი მეხუთე ტიტულის მოლოდინში - ასტონ ვილა ფინალშია

ასტონ ვილას მთავარმა მწვრთნელმა, უნაი ემერიმ, განაცხადა, რომ მისმა გუნდმა იდეალურად შეასრულა დასახული გეგმა.

ბირმინგემელებმა ნოტინგემ ფორესტი 4:0 გაანადგურეს და ევროპა ლიგის ფინალში გავიდნენ.

ევროპა ლიგისა და კონფერენს ლიგის ფინალისტები ცნობილია

ეს არის ასტონ ვილას პირველი ევროპული ფინალი ბოლო 44 წლის განმავლობაში. უნაი ემერი კი ევროპა ლიგის მეხუთე ტიტულისთვის იბრძოლებს (მანამდე სამჯერ სევილიასთან და ერთხელ ვილიარეალთან ერთად გაიმარჯვა). ფინალში ინგლისელთა მეტოქე გერმანული ფრაიბურგი იქნება.

ემერიმ განაცხადა:

ჩვენ ვცდილობდით უკეთ მოვმზადებულიყავით და ფეხბურთელებმა ფანტასტიკურად უპასუხეს გამოწვევას. გამარჯვება ზუსტად ჩვენი გეგმის ნაწილი იყო.

აღსანიშნავია, რომ მატჩს უელსის პრინცი უილიამი ესწრებოდა, რომელიც მოგვიანებით გასახდელში გუნდს გამარჯვების აღნიშვნისას შეუერთდა.

მიუხედავად წარმატებისა, ემერიმ აღნიშნა, რომ გუნდი ახლა პრემიერ ლიგაზე უნდა გადაერთოს, რათა მომავალი სეზონისთვის ჩემპიონთა ლიგის საგზური გაინაღდოს:

ჯერ კიდევ გვაქვს ფინალი სათამაშო. შეგვიძლია მოვიგოთ ან წავაგოთ, მაგრამ თუ წავაგებთ, ჩავთვლით, რომ არაფრისთვის მიგვიღწევია. ამიტომ კვირას პრემიერ ლიგაზე უნდა ვიყოთ ფოკუსირებულები.

რაც შეეხება ნოტინგემ ფორესტს, გუნდმა მარტის შემდეგ პირველი მარცხი იგემა. ვიტორ პერეირამ წაგების მიზეზად საკადრო პრობლემები და გადაღლილობა დაასახელა, თუმცა აღნიშნა, რომ თავისი ფეხბურთელებითა და გულშემატკივრებით მაინც ამაყობს.