ნახევარმცველმა ადამ უორტონმა ოლივერ გლასნერი კრისტალ პალასის ისტორიაში საუკეთესო მწვრთნელად დაახასიათა მას შემდეგ, რაც მან გუნდს ლაიფციგში კონფერენს ლიგის ჩემპიონობა მოუპოვა.
გლასნერი ახლა პასუხისმგებელია სამივე მთავარ ტიტულზე, რაც კი პალასს თავის ისტორიაში ოდესმე მოუგია. გასულ წელს მან კლუბს ასოციაციის თასი და სუპერთასი მოაგებინა, მიმდინარე სეზონში კი გუნდს პირველი ევროპული ტიტული ჩაუტანა.
ლაიფციგში გამართული ფინალი მისი ბოლო მატჩი იყო კლუბში, რადგან სეზონის დასრულებისთანავე ის გუნდს თავისუფალი აგენტის სტატუსით ტოვებს.
რაიო ვალეკანოს დამარცხების შემდეგ, უორტონმა გლასნერის გავლენაზე ემოციურად ისაუბრა:
ეს მისი ბოლო მატჩი იყო პალასის მწვრთნელის პოსტზე. ის სხვაობა, რაც მან ორნახევარ წელიწადში შექმნა, უბრალოდ დაუჯერებელია. სამი ტიტული კრისტალ პალასისთვის, პირველი სამი ტიტული კლუბის ისტორიაში და პირველი ევროპული ტურნირი, რომელიც მოვიგეთ - ეს წარმოუდგენელია. ის ალბათ საუკეთესო მწვრთნელია, ვინც კი გუნდს ოდესმე ჰყოლია.
უორტონმა გასულ წელს ასოციაციის თასის მოგების აღნიშვნა გუნდთან ერთად ვერ შეძლო, რადგან მატჩისას თავის ტრავმა მიიღო და საავადმყოფოში გადაიყვანეს. მან დასძინა, რომ შესაძლოა ლაიფციგში გამართული საჩემპიონო წვეულებაც გამოტოვოს, რადგან მატჩის შემდეგ დოპინგ-ტესტზე შემთხვევითი პრინციპით შეარჩიეს. მიუხედავად ამისა, ის პირობას დებს, რომ დაკარგულ დროს აუცილებლად აანაზღაურებს:
დიდი წვეულება იქნება. გასულ წელს თასის ზეიმი გამოვტოვე, ასე რომ, ახლა ორი აღნიშვნა მაქვს ასანაზღაურებელი. სამწუხაროდ, დოპინგ-კონტროლზე გამომიძახეს, რაც ჩემს გეგმებს ცოტათი უფუჭებს, მაგრამ იმედია ამას მალე მოვრჩები და ლუდსა და ალკოჰოლს მივუჯდები. ყველაფერს 100 პროცენტით ავინაზღაურებ.
უორტონმა ფინალზეც გააკეთა კომენტარი:
ამ გრძნობის სიტყვებით გადმოცემა შეუძლებელია. თავიდან თამაში ცოტა დაძაბული იყო, როგორც ეს ფინალებს სჩვევია, მაგრამ ნელ-ნელა სივრცეები ვიპოვეთ და გამოვიყენეთ. ვფიქრობ, კიდევ რამდენიმე გოლის გატანა შეგვეძლო, თუმცა მთავარია საქმე ბოლომდე მივიყვანეთ და დიდებული შეხვედრა ჩავატარეთ.
