VIDEO: Alcaraz Mentality - ზვერევს უმძიმესი 1/2 ფინალი მოუგო და AO-ს ფინალში პირველად გავიდა

მსოფლიოს პირველი ჩოგანი, კარლოს ალკარასი ავსტრალიის ღია პირველობის ფინალში კარიერაში პირველად ითამაშებს.

ესპანელმა ვარსკვლავმა 1/2 ფინალში ალექსანდრ ზვერევთან 5-სეტიანი ურთულესი ბრძოლა გადაიტანა. სეტებში 2:0-ს იგებდა, თუმცა ზვერევმა წონასწორობა აღადგინა, თანაც პარალელურად ალკარასი ფეხის ტკივილმა შეაწუხა და ბოლომდე კომფორტულად ვერ ახერხებდა.

ფიზიკური პრობლემისა და მთელი სეტის განმავლობაში ბრეიკით ჩამორჩენის მიუხედავად, კარლიტოსმა ყველაზე საჭირო მომენტებში მოუმატა, როცა 3:5-ზე ზვერევი მატჩზე აწვდიდა, უკეთესად ათამაშდა და შეხვედრა თავის სასარგებლოდ დაასრულა - 6:4; 7:6; 6:7; 6:7; 7:5.

მატჩი 5 საათსა და 26 წუთს გაგრძელდა, რაც ავსტრალიის ღია პირველობის ისტორიაში ყველაზე ხანგრძლივი 1/2 ფინალური დაპირისპირებაა.

ალკარასს, ავსტრალიის ღია პირველობის გარდა, დანარჩენი სამივე დიდი სლემის ტიტული 2-2-ჯერ აქვს მოგებული, მელბურნში კი ფინალშიც კი პირველად გავიდა. აქამდე საუკეთესო შედეგი 1/4 ფინალი ჰქონდა - 2024 და 2025 წლებში.

22 წლისა და 258 დღის ასაკში, კარლიტოსი გახდა ისტორიაში ყველაზე ახალგაზრდა ჩოგბურთელი, ვისაც 4-ვე დიდი სლემის ტურნირის ფინალში ექნება მონაწილეობა მიღებული. შესაბამისად, შეუძლია გახდეს ისტორიაში ყველაზე ახალგაზრდა ჩოგბურთელი, ვინც კარიერულ სლემს შეასრულებს (4-ვე დიდი სლემის ტურნირის მოგება).

ამისთვის მას ფინალში ნოვაკ ჯოკოვიჩთან წარმატებული თამაში დასჭირდება - ნოლემ 1/2 ფინალში იანიკ სინერს ასევე 5 სეტში აჯობა და დიდი სლემის 38-ე ფინალში ითამაშებს.

ავსტრალიის ღია პირველობის 2026 წლის მამაკაცთა ფინალური შეხვედრა კვირას, 1-ელ თებერვალს, როდ ლეივერის სახელობის კორტზე გაიმართება.