VIDEO: ამერიკული დრამა US Open-ზე - პირველი ნახევარფინალისტი ცნობილია

ფრენსის ტიაფომ 22 წლის მიკელსენი დაძაბულ ხუთსეტიან ბრძოლაში - 5:7, 3:6, 7:5, 6:3, 7:6 (10:6) დაამარცხა და US Open-ის ნახევარფინალში გავიდდა.

ტურნირზე მე-11 ნომრად განთესილ ამერიკელ ტიაფოს ახალგაზრდა თანამემამულესთან ძალიან გაუჭირდა. მიკელსენი კარიერაში პირველად იყო დიდი სლემის ტურნირის მეოთხედფინალში გასული და ამ ეტაპამდე ერთი სეტიც კი არ ჰქონდა წაგებული.

მიკელსენი კიდევ ერთ სამსეტიან გამარჯვებასთან ძალიან ახლოს იყო, როდესაც მესამე სეტში, 5:4-ზე, მატჩზე აწვდიდა, თუმცა ორმა ორმაგმა შეცდომამ ტიაფოს შანსი მისცა და უფრო გამოცდილმა ჩოგბურთელმა ეს შესაძლებლობა გამოიყენა.

„ვგრძნობ, რომ მატჩი უბრალოდ ვაჩუქე“, - განაცხადა იმედგაცრუებულმა მიკელსენმა, რომელიც მსოფლიო რეიტინგში 46-ე ადგილს იკავებს. „ამის შემდეგ მან მართლაც ძალიან კარგად დაიწყო თამაში.“

გამარჯვებულის გამოსავლენად კიდევ ორი სეტი გახდა საჭირო. ოთხსაათიანი და 38-წუთიანი ბრძოლის შემდეგ ტიაფომ ფორჰენდით შესრულებული გამარჯვების მომტანი დარტყმით 10-ქულიანი მატჩის ტაი-ბრეიკი მოიგო. ბადესთან შეხვედრისას ატირებული მიკელსენი გამარჯვებულ მეტოქეს გადაეხვია.

„ვცდილობდი, ემოციები გამეკონტროლებინა, მაგრამ ეს კარგად ვერ მოვახერხე“, - თქვა მიკელსენმა. „მატჩი ემოციურად ძალიან დამღლელი იყო. ფრენსისი ძალიან კარგი ადამიანია. მან ბევრი პირადი რამ მითხრა და ამან ჩემზე ძალიან იმოქმედა.“

არტურ ეშის სახელობის კორტზე მიკელსენმა შეხვედრა აგრესიულად დაიწყო, ტიაფო კი მისთვის უჩვეულოდ პასიური იყო. ჩვეულებრივ, ამერიკელი გულშემატკივრების ენერგიით საზრდოობს.

„ისინი ჩუმად იყვნენ, მაგრამ მე გულშემატკივრებზე მეტადაც კი პასიური ვიყავი“, - თქვა ტიაფომ. „ამაზე ვხუმრობდი, თუმცა როგორც კი უკეთ თამაში დავიწყე, ისინიც ნამდვილად გამოცოცხლდნენ.“

მესამე სეტის გადარჩენის შემდეგ ტიაფოს თითქოს ახალი ენერგია მიეცა. გადამწყვეტ სეტში მიკელსენმა ადრეული ბრეიკი შეასრულა, თუმცა ტიაფო დანებებას არ აპირებდა.

„ეს უდიდესი მომენტია“, - განაცხადა ტიაფომ, რომელიც მომდევნო შეხვედრაში მოქმედ ჩემპიონ კარლოს ალკარასსა და მერვე ნომრად განთესილ ამერიკელ ბენ შელტონს შორის გამარჯვებულს დაუპირისპირდება.

„აქ ბევრი შესანიშნავი მატჩი მომიგია და ბევრი ძალიან მტკივნეული შეხვედრაც წამიგია. საოცარი შეგრძნებაა, რომ ამჯერად გამარჯვება მოვახერხე.“