VIDEO: ჩემპიონი დამარცხებულია - სან ანტონიო ფინალში 12 წლის შემდეგ პირველად ითამაშებს

NBA-ის დასავლეთ კონფერენციის 2025-26 წლების სეზონის საუკეთესო გუნდი სან ანტონიო სპერსია, რომელმაც ფინალურ სერიაში ოკლაჰომა სიტი თანდერს მე-7 მატჩი მოუგო და სატიტულო ეტაპზე ნიუ იორკ ნიქსს შეხვდება.

ოკლაჰომაში გამართულ გადამწყვეტ მატჩში, მასპინძლები პირველად მეორე პერიოდის ბოლო წუთებზე დაწინაურდნენ, თუმცა 4 ქულაზე მეტით ვერ გაიქცნენ, შემდეგ ერთხელაც ჰქონდათ 3-ქულიანი უპირატესობა - თამაშის მთელი დარჩენილი ნაწილი კი სპერსი ლიდერობდა და საბოლოოდ 111:103 გაიმარჯვა.

ვიქტორ ვემბანიამამ წარმატებაში წვლილი 22 ქულით, 7 მოხსნითა და 2 ასისტით შეიტანა; ჯულიენ შემპენს 20 ქულა, 6 მოხსნა, 1 ასისტი ჰქონდა; სტეფონ ქასლს - 16 ქულა, 6 მოხსნა, 6 ასისტი; ხოლო დე'აარონ ფოქსს - 15 ქულა, 5 ასისტი.

"ჩვენ ჯერ საქმე არ დაგვისრულებია. კიდევ ოთხი გვინდა", - თქვა მატჩის შემდეგ ვიქტორ ვემბანიამამ.

ოკლაჰომელებს შაი გილჯეს-ალექსანდერის 35 ქულა, 4 მოხსნა, 9 ასისტი არ ეყოთ; კეისონ უოლასმა გუნდს 17 ქულა, 7 მოხსნა, 4 ასისტი შესძინა.

სან ანტონიო სეზონის ფინალში 2014 წლის შემდეგ პირველად ითამაშებს და შეხვდება ნიუ იორკ ნიქსს, რომელიც ამ ეტაპზე ბოლოს 1999 წელს იყო და იქ ტიტული სწორედ სპერსთან დათმო - ლეგენდარული გრეგ პოპოვიჩის პირველი ჩემპიონობაა.

ფინალურ სერიაში მოედნის უპირატესობა ტექსასელებს ექნებათ და საწყისი ორი მატჩი მათთან ჩატარდება - 4 ივნისის 04:30 საათსა და 6 ივნისის 04:30 საათზე.