VIDEO: ერთი ნაბიჯი ჩემპიონობამდე - იბერია ბოლო ტურის წინაც ლიდერია
2 სთ წინ · 0 წთ წასაკითხად
ლინკის დაკოპირება
-
Aa
+
ფონტის ზომა
იბერია 1999-მა საქართველოს ჩემპიონობისკენ კიდევ ერთი ნაბიჯი გადადგა. დედაქალაქელებმა საგარეჯოს გარეჯს ნომინალურად სტუმრად 4:0 მოუგეს.
მატჩის პირველი 2 გოლი ერთი სცენარით გავიდა - მარცხენა ფლანგიდან გიორგი ჯინჯოლავამ ჩააწოდა და თავით ამირან ძაგანიამ გაიტანა. აღსანიშნავია, რომ ამ გოლებს შორის მოედნიდან კახელთა შემტევი სერგო კუხიანიძე გააძევეს, რამაც, ისედაც დიდი უპირატესობით მოთამაშე, იბერიას საქმე გაუმარტივა.
ძაგანიამ მიმდინარე ჩემპიონატში 7 გოლი მოაგროვა და მათგან 4 ცვლილებაზე შესვლის შემდეგ შეაგდო. 24 წლის თავდამსხმელი წლევანდელ სეზონში იბერია 2-ის რიგებშიც თამაშობდა და ეროვნული ლიგა 2-ში ჩატარებულ 17 მატჩში 4 გოლი აქვს. მან 2023-ისა და 2024 წლების სეზონები ვიტ ჯორჯიაში გაატარა და ეროვნულ ლიგა 2-ში ჯამურად 67 შეხვედრაში 35 გოლი და 6 ასისტი ჩაიწერა აქტივში.
მეორე ნახევრის შუაში ძაგანია შეცვალა გურამ გოშთელიანმა, რომელმაც 78-ე წუთზე საბოლოო ანგარიში დააფიქსირა. მის გოლამდე კი 20 წლის ნიკოლოზ დადიანმა მიმდინარე ჩემპიონატში თავისთვის მე-3 გოლი შეაგდო - ერთიც თასზე დინამო ბათუმს გაუტანა.
იბერიელთა კონკურენტმა გორის დილამ თავისი მატჩი ასევე იოლად მოიგო - ფოთის კოლხეთს სამეგრელოში 4:1 აჯობეს.
შედეგად, იბერიასა და დილას 77-77 ქულა აქვთ და ჩემპიონატის დასრულებამდე 1 ტური რჩება. თანაბარი ქულების შემთხვევაში, ჩემპიონი იბერია ხდება - დილას 4-ვე ურთიერთშეხვედრა მოუგო (ჯამური ანგარიშით 10:1).
6 დეკემბერს, ერთმანეთის პარალელურად, ლიდერებს საშინაო მატჩები აქვთ: თბილისელები გაგრას ხვდებიან, გორელები - დინამო თბილისს.
