VIDEO: ისტორიაში პირველად - ბაიერნმა ბუნდესლიგის ახალი რეკორდი დაამყარა

მიუნხენის ბაიერნმა ბუნდესლიგაში მორიგი მატჩი მოიგო და ორი რეკორდი დაამყარა. ვენსან კომპანის გუნდმა კიოლნს სტუმრად, გნაბრის, კიმისა და კარლის გოლებით, 3:1 აჯობა.

ბავარიელებს 15 მოგება და 2 ფრე (მაინცთან და უნიონ ბერლინთან) აქვთ. შესაბამისად, 17 ტურის შემდეგ 47 ქულა, რაც მათივე 2013-14 წლების სეზონის რეკორდის გამეორებაა - მაშინ პეპ გუარდიოლა წვრთნიდათ.

რაც შეეხება მეორე რეკორდს, ის უნიკალურია, რადგან ბუნდესლიგის ისტორიაში პირველად მოხდა, როცა კონკრეტულმა გუნდმა 17 ტურში 66 გოლი გაიტანა.

საგულისხმოა, რომ რეკორდმაისტერი კიოლნში აგებდა, თუმცა თამაში დაატრიალა და დაგეგმილი 3 ქულა აიღო. საბოლოო ანგარიში დააფიქსირა 17 წლის ლენარტ კარლმა, რომელმაც წლევანდელ ჩემპიონატში 6 საგოლე მოქმედება (4 გოლი და 2 ასისტი) მოაგროვა.

ბაიერნი მეორეადგილოსან დორტმუნდს 11 ქულით უსწრებს. მომდევნო ტურში, 17 იანვარს, მე-3 ადგილზე მყოფ ლაიპციგს სტუმრად შეხვდება.