იტალიის ღია პირველობის მეორე წრეში საკვალიფიკაციო ეტაპიდან მოხვედრილმა დინო პრიჟმიჩმა ნოვაკ ჯოკოვიჩი დაამარცხა.
მსოფლიოს მე-4 ნომერმა 12 მარტის შემდეგ პირველი მატჩი ჩაატარა და რაც უფრო მნიშვნელოვანია, წელს პირველად თამაშობდა თიხის საფარზე მას შემდეგ, რაც მხრის ტრავმის გამო რამდენიმე ტურნირი გამოტოვა.
რომში 6-გზის ჩემპიონმა შეხვედრა ძლიერად დაიწყო, თუმცა მეორე სეტში ნელა მოძრაობდა და ეტყობოდა, რომ თავს შეუძლოდ გრძნობდა.
თუმცა ეს არაფერს აკლებს ხორვატი პრიჟმიჩის დამსახურებას, რომელმაც უშიშრად ითამაშა და სერბს 2-6, 6-2, 6-4 მოუგო.
20 წლის ჩოგბურთელმა, რომელიც ჯოკოვიჩს თავის კერპად მიიჩნევს, მატჩის შემდეგ კამერის ლინზაზე დაწერა:
ნოლე, ეს დიდი პატივი იყო.
ჯოკოვიჩმა, რომელმაც იტალიაში პირველ წრეში თავისუფალი ბადე მიიღო, მატჩის შემდეგ განაცხადა, რომ საფრანგეთის ღია პირველობამდე, რომელიც 24 მაისს იწყება, აღარ ითამაშებს. იქ ის კიდევ ერთხელ ეცდება რეკორდული, 25-ე გრანდ სლემის ტიტულის მოპოვებას ერთეულთა თანრიგში.
„ჯერ ნამდვილად არ ვარ იმ დონეზე, სადაც მსურს ვიყო, რათა უმაღლეს დონეზე ვიასპარეზო და შორს გავიდე ტურნირზე,“ - თქვა 38 წლის ჯოკოვიჩმა.
არ მახსოვს ბოლოს როდის მქონდა ისეთი მომზადება, როცა ტურნირზე მისვლამდე არანაირი ფიზიკური ან ჯანმრთელობის პრობლემა არ მქონია.
ყოველთვის რაღაც ხდება. ეს ერთგვარი ახალი რეალობაა, რომელთან გამკლავებაც მიწევს.“
ჯოკოვიჩი, რომელმაც გასულ წელს როლან გაროსზე ნახევარფინალამდე მიაღწია, იანვარში ავსტრალიის ღია პირველობის ფინალში გავიდა, სადაც 4 სეტში კარლოს ალკარასთან დამარცხდა.
ის საფრანგეთის ღია პირველობის დაწყებამდე 2 დღით ადრე 39 წლის გახდება.
