VIDEO: მექვაბიშვილმა ახალ სეზონში მეორე საგოლე მოქმედება შეასრულა

ანრი მექვაბიშვილის უნივერსიტატეა კრაიოვამ, რუმინეთის სუპერლიგის მე-3 ტურში, პეტროლული 4:0 გაანადგურა.

მოქმედმა ჩემპიონებმა მეორე ტაიმის დასაწყისშივე 3-ბურთიანი უპირატესობა მოიპოვეს, 65-ე წუთზე კი მექვაბიშვილმა საგოლე პასი შეასრულა და საბოლოო ანგარიში დაფიქსირდა.

ქართველმა ნახევარმცველმა ლამაზი კომბინაცია გამოზომილი ასისტით დაასრულა და ახალ სეზონში მე-2 საგოლე მოქმედება შეასრულა - ჩემპიონთა ლიგის საკვალიფიკაციოს მატჩში, ბელარუსულ ვიტებსკთან ასევე ასისტი მიითვალა.

3 ტურის შედეგებით, კრაიოვამ 6 ქულა მოაგროვა და სატურნირო ცხრილს სტიაუა ბუქარესტთან ერთად ლიდერობს, ოღონდ, დედაქალაქელებს ამ ტურის შეხვედრა ჯერ არ ჩაუტარებიათ.

კრაიოვა შუა კვირაში, ევროპა ლიგის საკვალიფიკაციო ეტაპის მე-3 რაუნდის ეგიდით, ფინურ კუპს-ს ესტუმრება (6 აგვისტოს), ხოლო უქმეებზე არგეშს უმასპინძლებს (9 აგვისტოს).