დაცვაში დაშვებული შეცდომები ლოს ანჯელეს ლეიკერსის კალათბურთელებს შორის დაპირისპირების მიზეზი გახდა.
ინციდენტი NBA-ის თასის ფარგლებში საკრამენტო კინგსთან გამართული მატჩის დროს მოხდა. ლუკა დონჩიჩმა თანაგუნდელი სანდრო მამუკელაშვილი დაცვაში განმეორებით დაშვებული შეცდომების გამო გააკრიტიკა.
შეხვედრაში ლეიკერსმა პირველი ტაიმის შემდეგ არსებული 8-ქულიანი ჩამორჩენა აღმოფხვრა და საბოლოოდ 106:104 გაიმარჯვა.
დაპირისპირება მაშინ მოხდა, როდესაც ლეიკერსის კალათბურთელები შესვენებაზე გასახდელისკენ მიემართებოდნენ. იმ მომენტში გუნდი ანგარიშით 54:62 მარცხდებოდა.
ინციდენტის შემდეგ სოციალურ ქსელებში გავრცელდა ვიდეო, რომელშიც სლოვენიელი გამთამაშებელი მამუკელაშვილს აკრიტიკებს. კადრებმა ყურადღება კიდევ ერთხელ გაამახვილა გუნდის დაცვით პრობლემებზე, მიუხედავად იმისა, რომ ლეიკერსმა საბოლოოდ გამარჯვება მოიპოვა.
გავრცელებულ კადრებში ჩანს, როგორ გამოხატავს დონჩიჩი უკმაყოფილებას იმის გამო, რომ მისი თანაგუნდელი მეტოქეებს დაცვის დროს ვერ აჩერებს.
ყოველ მატჩში დაცვაში მეტოქეები ადვილად სცდებიან. ყოველ ჯერზე!
კრიტიკა მამუკელაშვილის დაცვაში გადაადგილებასა და მეტოქეების შეჩერების სირთულეებს უკავშირდებოდა. ინციდენტმა კიდევ ერთხელ წამოჭრა კითხვები ქართველი კალათბურთელის დაცვით შესაძლებლობებთან დაკავშირებით, მიუხედავად იმისა, რომ ლეიკერსში სადებიუტო სეზონში მან გუნდის როტაციაში მნიშვნელოვანი ადგილი დაიმკვიდრა.
სტატისტიკის თანახმად, საკრამენტოსთან შეხვედრამდე, ქართველი ფორვარდი საშუალოდ 23.3 წუთს თამაშობდა და 9.6 ქულასა და 4.1 მოხსნას აგროვებდა.
ეს მაჩვენებლები ადასტურებს, რომ მამუკელაშვილს გუნდისთვის შეტევასა და სხვა კომპონენტებში მნიშვნელოვანი სარგებელი მოაქვს, თუმცა საკრამენტოსთან მატჩში განსაკუთრებული ყურადღება მისმა დაცვითმა თამაშმა მიიპყრო.
VIDEO: მამუკელაშვილს ორმაგ დუბლამდე ცოტა დააკლდა - ლეიკერსმა მოიგო