VIDEO: სეხუდოს რევანში 36 წამში - მერაბი დამარცხდა

ჰენრი სეხუდოს RAF 12-ზე შთამბეჭდავი გამარჯვების მოსაპოვებლად მხოლოდ 36 წამი დასჭირდა.

სულ რამდენიმე კვირის წინ სეხუდომ მერაბ დვალიშვილთან დიდი უპირატესობა გაანიავა და მსაჯების გადაწყვეტილებით დამარცხდა, ამჯერად კი რევანში აიღო, კლივლენდში, Rocket Arena-ზე გამართულ შეხვედრაში მეტოქე 36 წამში ბეჭებზე დააწვინა და გამარჯვება მოიპოვა.

შეხვედრის დაწყებისთანავე სეხუდო მეტოქის ცალ ფეხში დაბალ შესვლაზე წავიდა და მის წაქცევას შეეცადა. დვალიშვილმა დაცვა და მოძრაობით პოზიციიდან თავის დაღწევა სცადა, თუმცა სეხუდომ სიტუაცია თავის სასარგებლოდ შემოატრიალა, ზემოდან მოექცა და მეტოქე ბეჭებზე დააწვინა.

ამ შედეგმა შესაძლოა ორგანიზაციას ამ ორ სპორტსმენს შორის ტრილოგიის გამართვისკენ უბიძგოს, თუმცა ჯერჯერობით უცნობია, შედგება თუ არა მესამე შეხვედრა.

დღევანდელი დაპირისპირების შემდეგ როგორც სეხუდოს, ისე დვალიშვილს RAF-ში 2 მოგება და 1 მარცხი აქვთ.

ამ გამარჯვებით ჰენრი სეხუდო RAF-ის ქამარს დაეუფლა, მერაბ დვალიშვილი კი პიოტრ იანთან ბრძოლისთვის მზადებას გააგრძელებს, რომელიც 24 ოქტომბერს აბუ დაბიში გაიმართება.