VIDEO: სენსაცია ლანჩხუთში - მე-3 ლიგელმა გურიამ დინამო თასიდან გამოთიშა

დავით ყიფიანის სახელობის საქართველოს თასის 1/16 ფინალში, ისტორიულ-ტრადიციული აფიშა იყო - ამჟამად მესამელიგელმა, გურია ლანჩხუთმა დინამო თბილისს უმასპინძლა და თასის გათამაშებას გამოთიშა.

ლანჩხუთში, ევგრაფი შევარდნაძის სახელობის სტადიონზე, გურულებმა მაგარი საფეხბურთო ატმოსფერო შექმნეს, რასაც ფეხბურთელებისგან კარგი თამაში მოჰყვა და თემურ ქეცბაიას გუნდს, ლუკა ჩაგანავას ერთადერთი გოლით, 1:0 მოუგეს.

გურია ლანჩხუთი: რეზო ლომიძე, ლევან კაკუბავა (კაპ.), ნიკოლოზ ნოზაძე, დავით მაისაშვილი, დათა სიჭინავა (ალექსანდრე ხუნდაძე; 92), ვანო შარვაძე (კახა კახაბრიშვილი; 68), ცოტნე ჩოთალიშვილი (გეგი გეგუჩაძე; 61), კიჭი მელიავა, ნოდარ იაშვილი, ლუკა ჩაგანავა, ლუკა ქოქოსაძე (თორნიკე კაპანაძე; 68). მთ. მწვრთნელი: გოჩა ტყებუჩავა.

დინამო თბილისი: მიხეილ მაქაცარია, სანდრო კალანდაძე, მათე ვაწაძე, პარის პსალტისი, დანიელ ქვარცხავა (ალგასიმ ბა; 46), ნიკა ნინუა, ჯაბა კანკავა (ლუკა ციკოლია; 46), ნუმან კურდიჩი, ლევან ხარაბაძე (გაბრიელ გოგუა; 46), ლიას ჰური (თორნიკე კვარაცხელია; 58), მეთიუ გბომადუ (ნიკოლოზ ტკალია; 58). მთ. მწვრთნელი: თემურ ქეცბაია.

შედეგად, გურია ლანჩხუთი შემდეგ ეტაპზე, 1/8 ფინალში გავიდა და ეროვნული ლიგა 2-ის წარმომადგენელ არაგვი დუშეთს შეხვდება - 2 აგვისტოს 16:30 საათიდან, ევგრაფი შევარდნაძეზე.

გურული კლუბის ხელმძღვანელობა სეზონის წინ შეიცვალა. მერაბ ჟორდანიას ვაჟი, კახი ჟორდანიაა სათავეში, მთავარი მწვრთნელი გოჩა ტყებუჩავაა, ხოლო შემადგენლობაში არაერთი გამოცდილი ფეხბურთელი თამაშობს - მეკარე ლევან ისიანი, ლევან კაკუბავა, დავით მაისაშვილი, ნოდარ იაშვილი, დათა სიჭინავა, თემურ შარაშენიძე, კიჭი მელიავა, კახა კახაბრიშვილი, ვატო არველაძე, თორნიკე კაპანაძე...

ეროვნული ლიგა 3-ის 15 ტურის შემდეგ, ლანჩხუთელები მე-2 პოზიციაზე არიან და დაუმარცხებელ ლიდერ თბილისი 2025-ს 6 ქულით ჩამორჩებიან.

ფოტო: გურია ლანჩხუთი